مەملەكەت بيزنەستىڭ «قالتاسىنا» قول سۇعۋمەن اۋەستەنىپ كەتتى - جاقسىبەك قۇلەكەيەۆ

استانا. KAZINFORM - بەلگىلى ەكونوميست، «قازمۇنايگاز» ۇلتتىق كومپانياسى ءتوراعاسىنىڭ كەڭەسشىسى جاقسىبەك قۇلەكەيەۆ ءماجىلىستىڭ سالىق كودەكسىن تالقىلاۋعا ارنالعان جۇمىس توبىنىڭ وتىرىسىندا ۇكىمەت بيۋدجەت ءتارتىبىن ساقتاماۋدى ادەتكە اينالدىرعانىن سىنادى.

- قورقۋدىڭ كەرەگى جوق. ادامدار سالىقتىڭ جوعارى ەكەنىنە شاعىم ايتادى. ويتكەنى ءباز بىرەۋلەر سالىق تولەمەي وتىر. ەگەر ەلدە سالىق سالۋ ساياساتى ادىلەتتى بولسا، بارىنە بىردەي جۇكتەمە ارتسا، ەشكىم ەشتەڭەگە شاعىمدانبايدى. سونداي-اق، ءبىز ءتۇرلى جاعدايلاردىڭ اسەرىنەن بيۋدجەت ءتارتىبىن تومەن ءتۇسىرىپ جىبەرگەنىمىز سونشا، اسىرەسە بىلتىر الدىڭعى جىلدارمەن سالىستىرعاندا 5 ەسە از سالىق جينادىق. ونىڭ وبەكتيۆتى دە، سۋبەكتيۆتى دە سەبەپتەرى بار. بيىل دا سولاي جۇمىس ىستەسەك، الداعى بىرنەشە جىلدا ەلدى قۇرتىپ تىنامىز، - دەدى ول.

ساراپشى ەكونوميكاداعى جەكە ينۆەستيتسيانىڭ ۇلەسى ازايىپ كەتكەنىنە الاڭدايتىنىن دا ايتتى.

- ءبىز بيزنەسمەندەردىڭ قالتاسىنا زاڭدى جولمەن دە، زاڭسىز جولمەن دە قول سالۋمەن اۋەستەنىپ كەتتىك. ولار دا بۇعان شىداي بەرمەيدى. بىلتىر ەكونوميكاعا سالىنعان جەكە ينۆەستيتسيانىڭ ءوسىمى 1,7 پايىز بولدى. ونىڭ الدىنداعى جىلداردا كەمىندە 10 پايىزدان اساتىن. ينۆەستيتسيا بولماسا، بولاشاق تا جوق. سوندىقتان سالىق كودەكسى دەگەن وتە سالماقتى قۇجات. ونى وتە مۇقيات تارازىلاپ قانا پىسىقتاۋ كەرەك. ونىڭ ۇستىنە بۇل قابىلداعالى وتىرعان قۇجات الداعى 10 جىلداعى جاعدايىمىزدى ايقىندايدى، - دەدى جاقسىبەك قۇلەكەيەۆ.

ەسكە سالساق، 20 -اقپاندا ماجىلىسكە سالىق كودەكسىنىڭ تۇزەتىلگەن جوباسى ەنگىزىلگەن ەدى. بۇگىن سول قۇجاتتى پىسىقتايتىن ءماجىلىستىڭ جۇمىس توبى ىسكە كىرىستى.

كودەكستىڭ جاڭا رەداكسياسىنداعى نەگىزگى تۇزەتۋلەر مىنالار:

➤ قوسىلعان قۇن سالىعى بويىنشا مىندەتتى تىركەۋ شەگىن تومەندەتۋ - 20000 ا ە ك (78,6 ميلليون تەڭگە) 3800 ا ە ك (15 ميلليون تەڭگە) دەيىن؛ 
➤ قوسىلعان قۇن سالىعىنىڭ مولشەرلەمەسىن ارتتىرۋ - %12- دان %16- عا دەيىن، بۇعان قوسا ءبىرقاتار سالا ءۇشىن تومەندەتىلگەن مولشەرلەمە %10 بەلگىلەنەدى؛

➤ جەڭىلدەتىلگەن دەكلاراتسيا بويىنشا ارنايى سالىق رەجيمىن قولدانۋدى شەكتەۋ - تەك B2C سەگمەنتىنە (بيزنەس تۇپكىلىكتى تۇتىنۋشىلار ءۇشىن) قولجەتىمدى بولادى.

ايتا كەتەلىك بەلگىلى ەكونوميست الماس چۋكين ءماجىلىستىڭ سالىق كودەكسىن تالقىلاۋعا ارنالعان جۇمىس توبىنىڭ وتىرىسىندا سالىق رەفورماسىن كەشىكتىرۋگە بولمايتىنىن ءمالىم ەتكەن ەدى.

اۆتور

ەسىمجان ناقتىباي