مەملەكەت باسشىسىنا ەلىمىزدەگى سۋديالار كورپۋسىنىڭ قازىرگى جاي-كۇيى باياندالدى

استانا. KAZINFORM - پرەزيدەنت جوعارى سوت كەڭەسىنىڭ ءتوراعاسى دەنيس شيپپتى قابىلدادى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

مەملەكەت باسشىسىنا جوعارى سوت كەڭەسىنىڭ 2023 -جىلى اتقارعان قىزمەتىنىڭ قورىتىندىسى، ەلىمىزدەگى سۋديالار كورپۋسىنىڭ قازىرگى جاي-كۇيى جانە الداعى كەزەڭگە ارنالعان جوسپارى جونىندە باياندالدى.

دەنيس شيپپتىڭ ايتۋىنشا، كەڭەس بىلتىر مەملەكەت باسشىسى جۇكتەگەن ءبىرقاتار مىندەتتى جۇزەگە اسىرعان. اتاپ ايتقاندا، جوعارى سوت كەڭەسىن ينستيتۋتسيونالدىق تۇرعىدا كۇشەيتۋ جانە سۋديا بولۋعا ۇمىتكەرلەردى دايىنداۋ، بىلىكتىلىگىن كوتەرۋ، ولاردىڭ شەكتى جاسىن ۇزارتۋ، وكىلەتتىكتەرىن ۋاقىتشا توقتاتۋ نەمەسە مۇلدە توقتاتۋ ماسەلەلەرىن اتالعان ورگاننىڭ قۇزىرەتىنە بەرۋ جۇمىستارى اتقارىلعان.

قاسىم-جومارت توقايەۆقا كەڭەستىڭ سۋديالاردى ىرىكتەۋ ءتارتىبىن جەتىلدىرۋ، اشىقتىق پەن تيىمدىلىكتى قامتاماسىز ەتۋ جۇمىستارى تۋرالى مالىمەت بەرىلدى. قابىلدانعان شارالاردىڭ ناتيجەسىندە جاڭادان تاعايىندالعان سۋديالاردىڭ قاتارىن كوبەيتۋ ءۇردىسى ساقتالىپ وتىر. بىلتىر سۋديا لاۋازىمىنا العاش رەت ۇسىنىلعان ازاماتتاردىڭ سانى سوت جۇيەسىنەن كەتكەندەرگە قاراعاندا 32 ادامعا ارتىق بولدى. گەندەرلىك تۇرعىدان ايەل سۋديالاردىڭ سانى ەر ادامدارمەن سالىستىرعاندا 172 ادامعا كوپ. سۋديالاردىڭ ورتاشا جاس مولشەرى - 46 جاس، ال ەڭبەك ءوتىلى - 13 جىل.

ىرىكتەۋ بارىسىندا اشىقتىق پەن جاريالىلىقتى قامتاماسىز ەتۋ ءۇشىن كونكۋرس راسىمدەرىن ونلاين-ترانسلياتسيا جاساۋ جانە ونىڭ قورىتىندىسى تۋرالى ەگجەي-تەگجەيلى تۇسىنىكتەمە بەرۋ تاجىريبەسى العاش رەت ەنگىزىلدى. سونىمەن قاتار وتكەن جىلى پارلامەنت سەناتىنىڭ قاراۋىنا ەنگىزۋ ءۇشىن مەملەكەت باسشىسىنا جوعارعى سوت سۋديالارىنىڭ لاۋازىمىنا ۇمىتكەرلەر ءتىزىمى ءبىرىنشى رەت بالاما نەگىزدە ۇسىنىلدى.

بۇدان بولەك، اۋداندىق سوت ءتوراعالارىن سايلاۋ تارتىبىنە جاڭا ەلەمەنتتەردىڭ ەنگىزىلۋىنە بايلانىستى پرەزيدەنتكە سۋديا لاۋازىمى ءۇشىن كادرلىق رەزەرۆ جاساقتاۋ ينستيتۋتىنىڭ ءرولى كۇشەيتىلگەنى جونىندە اقپارات بەرىلدى.

قازىرگى تاڭدا شەشىم شىعارۋ بارىسىندا سۋديالاردىڭ زاڭدى ورەسكەل بۇزعانى ءۇشىن كۇشى جويىلعان ءاربىر سوت اكتىسىن سوت جيۋريىنىڭ تەكسەرۋ مەحانيزمىن زاڭ جۇزىندە ەنگىزۋ جۇمىستارى جۇرگىزىلىپ جاتىر.

كەزدەسۋ سوڭىندا قاسىم-جومارت توقايەۆ سۋديالاردىڭ تاۋەلسىزدىگىن كۇشەيتۋگە جانە ولاردى ساپالى تۇردە ىرىكتەۋگە باعىتتالعان رەفورمالاردى ءتيىمدى جۇزەگە اسىرۋ جۇمىستارىن جالعاستىرۋدى تاپسىردى.

اۆتور

باقىتگۇل اباي قىزى