مەملەكەت باسشىسى يسلام دامۋ بانكىنىڭ پرەزيدەنتىمەن كەزدەستى
استانا. KAZINFORM - مەملەكەت باسشىسى يسلام دامۋ بانكىنىڭ پرەزيدەنتى مۇحاممەد سۋلەيمان ءال- دجاسسەردى قابىلدادى، دەپ حابارلايدى اقوردا.
كەزدەسۋدە بۇعان دەيىن قول جەتكىزىلگەن كەلىسىمدەردى ىسكە اسىرۋ جانە ىنتىماقتاستىق پەرسپەكتيۆاسىنا قاتىستى ماسەلەلەر تالقىلاندى. قورشاعان ورتانى قورعاۋ سالاسىنا، سونىڭ ىشىندە كليماتتىق وزگەرىس سالدارىن جەڭىلدەتۋ جانە «جاسىل» ەنەرگەتيكاعا كوشۋ شارالارى بويىنشا بىرلەسكەن جوبالارعا باسا نازار اۋدارىلدى. قاسىم- جومارت توقايەۆ جاھاندىق ەكولوگيالىق سىن- قاتەرلەر مەن قازاقستاننىڭ ورنىقتى دامۋعا ۇمتىلىسى جاعدايىندا بۇل باستامالاردىڭ ماڭىزى زور ەكەنىن اتاپ ءوتتى.
قازاقستان پرەزيدەنتى بيىل قىركۇيەك ايىندا استانادا وتكەن اراب ۇيلەستىرۋ توبىنىڭ دوڭگەلەك ۇستەل فورماتىنداعى باسقوسۋىنىڭ قورىتىندىسىنا جوعارى باعا بەردى. بۇل ءىس- شارا تاراپتاردىڭ ستراتەگيالىق جوبالاردى جۇزەگە اسىرۋداعى كوپجاقتى ىنتىماقتاستىقتى تەرەڭدەتۋگە ءوزارا بەيىلدى ەكەنىن كورسەتتى.
مەملەكەت باسشىسى «كليمات وزگەرىسىنە ءتوزىمدى سۋ رەسۋرستارىن دامىتۋ» جوباسى بويىنشا قارجىلىق جانە تەحنيكالىق كەلىسىمنىڭ ءبىرىنشى فازاسىنا قول قويىلعانىن ايتتى. اتالعان جوبانى ىسكە اسىرۋ قازاقستاننىڭ 7 وبلىسىندا 8 سۋ قويماسى مەن جالپى ۇزىندىعى 3450 شاقىرىم بولاتىن 115 كانالدى، 1 قارسى رەتتەگىشتى سالۋعا جانە جوندەۋگە مۇمكىندىك بەرەدى. بۇل ەلىمىزدىڭ اگرارلىق سالاسىندا 332 مىڭ گەكتاردان استام القاپتى سۋمەن ۇزدىكسىز قامتاماسىز ەتەدى.
كەزدەسۋ سوڭىندا قاسىم- جومارت توقايەۆ قازاقستاننىڭ ورنىقتى ەكونوميكالىق دامۋىنا ۇدايى قولداۋ كورسەتىپ كەلە جاتقانى ءۇشىن يسلام دامۋ بانكىنىڭ باسشىلىعىنا ريزاشىلىعىن ءبىلدىردى.
كەلىسسوزدەر قورىتىندىسى بويىنشا قول قويىلعان قۇجاتتاردى الماسۋ ءراسىمى ءوتتى. كەلىسىم سوماسى 1,153 ميلليارد دوللاردى قۇرايدى، سونداي- اق 3,5 ميلليون دوللار كولەمىندە گرانت بەرىلەدى. بۇل - بانكتىڭ 51 جىلدىق تاريحىنداعى ەڭ كولەمدى قارجىلاندىرۋ جوباسى.
ەسكە سالايىق، بۇگىن پرەزيدەنت قاسىم- جومارت توقايەۆ دۇنيەجۇزىلىك كليمات سامميتىنە قاتىسۋ ءۇشىن باكۋدەگى وليمپيادالىق ستاديونعا باردى. سوسىن مەملەكەت باسشىسى باكۋدەگى دۇنيەجۇزىلىك كليمات سامميتىندە ءسوز سويلەدى.
