مەملەكەت باسشىسى وزبەكستان پرەزيدەنتى شاۆكات ميرزيەۆپەن تەلەفون ارقىلى سويلەستى
استانا. KAZINFORM - قاسىم-جومارت توقايەۆ ەلىمىزدىڭ ءبىرقاتار وڭىرىندە بولعان سۋ تاسقىنىنا بايلانىستى تىلەۋلەستىك تانىتىپ، كومەك كورسەتكەنى ءۇشىن شاۆكات ميرزيەۆكە جانە باۋىرلاس وزبەكستان حالقىنا العىس ايتتى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنتتەر قازاق-وزبەك ستراتەگيالىق سەرىكتەستىگىن ودان ءارى نىعايتۋ، سونداي-اق بۇعان دەيىن قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرىن تالقىلادى. تاراپتار ەكىجاقتى قاتىناستار مەن وڭىرلىك دەڭگەيدەگى كووپەراتسيانىڭ قارقىندى دامىپ كەلە جاتقانىنا نازار اۋداردى.
سونىمەن قاتار مەملەكەتتەر باسشىلارى ايماقتىق جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
بۇعان دەيىن وزبەكستان رەسپۋبليكاسىنان قازاقستانعا 15 جۇك كولىگىنە تيەلگەن گۋمانيتارلىق كومەك كەلگەنىن جازعان بولاتىنبىز.
اۆتور
ەلميرا ورالبايەۆا
