مەملەكەت باسشىسى گرۋزيا پارلامەنتىنىڭ ءتوراعاسى شالۆا پاپۋاشۆيليدى قابىلدادى
استانا. KAZINFORM - پرەزيدەنت گرۋزيا پارلامەنتىنىڭ ءتوراعاسى شالۆا پاپۋاشۆيليدى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسى قاسىم-جومارت توقايەۆ مەيمانعا ءىلتيپات بىلدىرە وتىرىپ، قازاقستان وڭتۇستىك كاۆكاز وڭىرىندەگى نەگىزگى سەرىكتەستەرىنىڭ ءبىرى - گرۋزيامەن جان-جاقتى قارىم-قاتىناستى نىعايتۋعا ايرىقشا ءمان بەرەتىنىن اتاپ ءوتتى. سونداي- اق پرەزيدەنت قازاقستان مەن گرۋزيا اراسىنداعى دوستىق پەن ءوزارا تۇسىنىستىك ەكىجاقتى بايلانىستاردى تەرەڭدەتۋ ىسىندە ەلەۋلى تابىسقا قول جەتكىزۋ ءۇشىن بەرىك نەگىز بولاتىنىن ايتتى.
قاسىم-جومارت توقايەۆ پارلامەنتارالىق ديالوگتىڭ مەملەكەتارالىق قاتىناستاردى نىعايتۋدا ماڭىزدى ءرول اتقاراتىنىنا توقتالدى. بۇل رەتتە «قازاقستان-گرۋزيا» پارلامەنتارالىق دوستىق توبى ىنتىماقتاستىقتىڭ كوكجيەگىن كەڭەيتۋگە ايتارلىقتاي ىقپال ەتە الاتىنىن اتاپ ءوتتى. ونىڭ ايتۋىنشا، بۇگىندە قازاقستاندىق بيزنەس گرۋزيا ەكونوميكاسىنىڭ ءتۇرلى سەكتورىندا قىزمەت ەتەدى جانە ەكى ەلدىڭ ساۋدا-ەكونوميكالىق قاتىناستارىن ودان ءارى كەڭەيتۋگە ۇلەس قوسىپ كەلەدى.
كەزدەسۋدە ەكى ەل اراسىنداعى مادەني-گۋمانيتارلىق بايلانىستاردى نىعايتۋعا باسا نازار اۋدارىلدى. قاسىم-جومارت توقايەۆ ورايلى ءساتتى پايدالانا وتىرىپ، فۋتبولدان ۇلتتىق قۇراماسى ەۋروپا چەمپيوناتىنىڭ اقتىق كەزەڭىنە شىققان دوستاس گرۋزيا حالقىن قۇتتىقتاپ، ساتتىلىك تىلەدى.
شالۆا پاپۋاشۆيلي قۇرمەت كورسەتكەنى ءۇشىن مەملەكەت باسشىسى مەن قازاقستان حالقىنا العىس ايتتى. سونداي-اق بۇل گرۋزيا پارلامەنتى ءتوراعاسىنىڭ قازاقستان رەسپۋبليكاسىنا العاشقى رەسمي ساپارى ەكەنىن، سوندىقتان ونىڭ ساپارى ايتۋلى وقيعا سانالاتىنىن اتاپ ءوتتى.
شالۆا پاپۋاشۆيلي گرۋزيانىڭ قازاقستانمەن اراداعى قارىم-قاتىناستى ودان ءارى نىعايتۋعا بەيىلدى ەكەنىن راستادى. ونىڭ ايتۋىنشا، تبيليسي استانامەن جان-جاقتى بايلانىستاردى، سونىڭ ىشىندە كولىك-لوگيستيكا سالاسىنداعى ىقپالداستىقتى تەرەڭدەتۋگە نيەتتى. بۇل رەتتە گرۋزيا پارلامەنتىنىڭ سپيكەرى مەملەكەت باسشىسىنىڭ ترانسكاسپي حالىقارالىق كولىك باعىتىن بىرلەسىپ دامىتۋ تۋرالى باستاماسىن قولدادى.
اۆتور
ابىلايحان جۇماشيەۆ
