مەملەكەت باسشىسى قىتايمەن اراداعى ۆيزاسىز رەجيمگە پىكىر ءبىلدىردى

پرەزيدەنت قاسىم-جومارت توقايەۆ قىتايمەن اراداعى قارىم-قاتىناستىڭ كەلەشەگى تۋرالى پايىمىن ايتتى، دەپ حابارلايدى Kazinform.

«بۇگىندە قازاقستان مەن قىتايدىڭ قارىم-قاتىناسى دوستىق، تاتۋ كورشىلىك جانە ماڭگىلىك ستراتەگيالىق سەرىكتەستىك رۋحىندا قارقىندى دامىپ كەلەدى. ءبىز ءتوراعا شي جينپيڭمەن بىرگە قازاقستان مەن قىتاي اراسىنداعى ىنتىماقتاستىقتىڭ جاڭا «التىن وتىز جىلدىعىنا» قادام باستىق. مەن بىلتىر قىتايعا ءبىر ەمەس، ەكى مارتە ساپارمەن باردىم. بۇل - ەلدەرىمىز اراسىنداعى تىعىز ىقپالداستىقتىڭ ايقىن دالەلى. قىتاي كوشباسشىسىمەن شياندا جانە بەيجىڭدە مازمۇندى كەلىسسوزدەر جۇرگىزىپ، ماڭىزدى ۋاعدالاستىقتارعا قول جەتكىزدىك. ونى جۇزەگە اسىرۋدىڭ ناقتى جولدارىن بەلگىلەدىك. وسىنداي جەكە جۇزدەسۋلەر استانا مەن بەيجىڭنىڭ بايلانىستارى جوعارى دەڭگەيدە ەكەنىن كورسەتەدى. بۇگىندە قازاق-قىتاي قاتىناستارى كوپكە ۇلگى بولىپ وتىر دەپ سەنىممەن ايتا الامىن»، - دەدى قاسىم-جومارت توقايەۆ.

پرەزيدەنت ەكى ەلدىڭ ءوزارا تاۋار اينالىمى جىل ساناپ ارتىپ كەلە جاتقانىن ەسكە سالىپ ءوتتى.

«ونىڭ كولەمى 2023 -جىلدىڭ 10 ايداعى قورىتىندىسى بويىنشا 24,3 ميلليارد دوللارعا جەتتى. بۇل - جاڭا رەكورد! قازىر ەكسپورتقا شىعارىلاتىن وتاندىق تاۋار تۇرلەرىن كوبەيتىپ، ق ح ر- عا جۇك تاسىمالىن ارتتىرۋ ءۇشىن بەلسەنە جۇمىس ىستەپ جاتىرمىز. قىتاي بۇرىننان قازاقستان ەكونوميكاسىنا مول قارجى قۇيعان ءىرى ينۆەستورلاردىڭ قاتارىنا كىرەدى. وسى ۋاقىتقا دەيىن ق ح ر ەلىمىزگە 24 ميلليارد دوللار ينۆەستيتسيا سالدى. قىتايمەن ورتاق شەكارامىزدىڭ بولۋى، شىعىس پەن باتىستىڭ اراسىنداعى ۇتىمدى جەردە تۇرعانىمىز قىتاي تاۋارلارىن ءتۇرلى باعىتقا قازاقستان اۋماعى ارقىلى تاسىمالداۋعا زور مۇمكىندىك بەرەدى. ويتكەنى بەيجىڭدە جوعارى دەڭگەيدە وتكەن «ءبىر بەلدەۋ، ءبىر جول» اتتى ءۇشىنشى فورۋم اياسىندا ءبىرقاتار ماڭىزدى قۇجاتقا قول قويىلدى. سونىڭ ىشىنەن ترانسكاسپي حالىقارالىق كولىك ءدالىزىن بىرلەسە دامىتۋ جونىندەگى كەلىسىمدى جانە «اياگوز – تاچەن» باعىتىنداعى تەمىر جول قۇرىلىسى تۋرالى مەموراندۋمدى اتاپ وتۋگە بولادى. بۇل كەلىسىمدەر ەلىمىزدىڭ كولىك-لوگيستيكا سالاسىنا تىڭ سەرپىن بەرەتىنىنە سەنىمدىمىن»، - دەدى مەملەكەت باسشىسى.

قاسىم-جومارت توقايەۆ قىتايدىڭ «ءبىر بەلدەۋ، ءبىر جول» مەگاجوباسىن تولىعىمەن قولدايتىنىن ايتادى.

«بىلتىر قازان ايىندا بەيجىڭدە وتكەن فورۋمدا سويلەگەن ءسوزىم - وسىنىڭ تاعى ءبىر دالەلى. قازاقستان مەن قىتاي اراسىندا ۆيزاسىز ءجۇرۋ رەجيمى كۇشىنە ەندى. مۇنىڭ ءمانى زور. ەندى وتانداستارىمىز كورشى ەلگە ەمىن-ەركىن بارىپ، كەلە الادى. ازاماتتارىمىز وسى مۇمكىندىكتى وڭتايلى پايدالانادى دەپ ۇمىتتەنەمىن. ەلىمىزدە قىتايعا قاتىستى باياعى قاساڭ تۇسىنىكتەرگە نەگىزدەلگەن نەمەسە بىزگە سىرتتان تاڭىلعان ءجونسىز ۇرەي بولماۋعا ءتيىس. قازىرگى قىتاي - وتە جوعارى دامىعان، سونىڭ ىشىندە وزىق تەحنولوگيا سالاسىندا زور تابىسقا جەتكەن مەملەكەت. مۇنى بۇكىل الەم مويىنداپ وتىر. سوندىقتان شىعىستاعى كورشىمىزبەن ىنتىماقتا بولۋ، دوستىق قارىم-قاتىناس پەن ءوزارا سەنىمنىڭ ارتىقشىلىقتارىن ءتيىمدى پايدالانۋ قازاقستان ءۇشىن اسا ماڭىزدى»، - دەدى پرەزيدەنت.

اۆتور

ەسىمجان ناقتىباي