مەملەكەت باسشىسى «قازمۇنايگاز» ۇ ك» ا ق باسقارما ءتوراعاسى ماعزۇم مىرزاعاليەۆتى قابىلدادى

استانا. KAZINFORM - قاسىم-جومارت توقايەۆقا ماعزۇم مىرزاعاليەۆ كومپانيانىڭ 2023-جىلعى وپەراتسيالىق جانە قارجىلىق قىزمەتىنىڭ قورىتىندىسى تۋرالى ەسەپ بەردى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

بەرىلگەن مالىمەتتەرگە سايكەس، بىلتىر «قازمۇنايگاز» 2022-جىلمەن سالىستىرعاندا نەگىزگى وندىرىستىك كورسەتكىشتەر بويىنشا وسىمگە قول جەتكىزگەن.

پرەزيدەنتكە قازاقستان مۇنايىنىڭ ەكسپورتتىق باعىتتارىن دامىتۋ ءىسى جونىندە باياندالدى. اتاپ ايتقاندا، گەرمانياعا جانە ازەربايجان باعىتىنا «باكۋ -تبيليسي-دجەيحان» مۇناي قۇبىرى ارقىلى شيكىزات جەتكىزىلە باستادى. سونداي-اق بىرىككەن اراب امىرلىكتەرىندەگى سەرىكتەستەرمەن بىرلەسىپ، تانكەر فلوتىن كەڭەيتۋ جۇمىستارى جۇرگىزىلدى.

مەملەكەت باسشىسىنا تاۋارلىق گاز ءوندىرىسىن ارتتىرۋ جانە ىشكى نارىققا مۇناي ونىمدەرىن ۇزدىكسىز جەتكىزۋدى قامتاماسىز ەتۋ، سونداي-اق ينۆەستيتسيا تارتۋ، مۇناي-گاز حيمياسى جوبالارىن دامىتۋ جونىندەگى تاپسىرمالارىنىڭ ورىندالۋ بارىسى جايىندا مالىمەت بەرىلدى.

سونىمەن قاتار ماعزۇم مىرزاعاليەۆ كاسپي تەڭىزىنىڭ قازاقستاندىق سەكتورىنداعى «قالامقاس-تەڭىز، حازار، اۋەزوۆ» تەڭىز جوباسى مەن ۇلتتىق كومپانيانىڭ گەولوگيالىق بارلاۋ باعدارلاماسىنىڭ قالاي ءجۇرىپ جاتقانىن جەتكىزدى.

بۇدان بولەك، قاسىم-جومارت توقايەۆقا «قازمۇنايگاز» كومپانياسىنىڭ كاسىپورىندارى ورنالاسقان وڭىرلەردە جۇزەگە اسىرىلىپ جاتقان الەۋمەتتىك جوبالار تۋرالى ايتىلدى. ماسەلەن، پرەزيدەنتكە «استراحان -ماڭعىشلاق» ماگيسترالدى سۋ قۇبىرىن قايتا جاڭعىرتۋ جوباسىنىڭ اياقتالعانى (I كەزەڭ) جانە ماڭعىستاۋ وبلىسى جاڭاوزەن قالاسىنىڭ قاجەتتىلىگى ءۇشىن جاڭا سۋ تۇشىتۋ زاۋىتىنىڭ قۇرىلىسى باستالعانى جونىندە باياندالدى.

كەزدەسۋ سوڭىندا مەملەكەت باسشىسى ينۆەستيتسيالىق جوبالاردى جۇزەگە اسىرۋ، كومىرسۋتەگى ەكسپورتىنىڭ باعىتتارىنداعى تۇراقتىلىقتى قامتاماسىز ەتۋ جانە گەولوگيالىق بارلاۋ جۇمىستارىنىڭ اۋقىمىن كەڭەيتۋ جونىندە ءبىرقاتار ناقتى تاپسىرما بەردى. پرەزيدەنت ۇلتتىق كومپانيانىڭ مۇناي-گاز حيمياسىن دامىتۋعا باعىتتالعان جۇمىسىنا ەرەكشە ءمان بەرۋ قاجەت ەكەنىن ايتتى.

اۆتور

باقىتگۇل اباي قىزى