مەملەكەت باسشىسى قازاقستان حالقىن تاۋەلسىزدىك كۇنىمەن قۇتتىقتادى
مەملەكەت باسشىسى قاسىم-جومارت توقايەۆ قازاقستان حالقىن تاۋەلسىزدىك كۇنىمەن قۇتتىقتادى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
«قۇرمەتتى وتانداستار!
سىزدەردى تاۋەلسىزدىك كۇنىمەن قۇتتىقتايمىن!
بۇل - حالقىمىزدىڭ مىزعىماس بىرلىگىن ايشىقتايتىن ۇلىق مەيرام. تاۋەلسىزدىك كۇنى ەلىمىزدىڭ ازاتتىعىن جانە جاڭا تاريحي كەزەڭدە دەربەس دامۋ جولىنا تۇسكەنىن ايگىلەيدى. ءبىز وسى مەرەيلى مەرەكەدە حالقىمىزدىڭ بوستاندىق تۋرالى ارمانىن اقيقاتقا اينالدىرۋعا ولشەۋسىز ۇلەس قوسقان ەرلەردىڭ رۋحىنا تاعزىم ەتەمىز.
ازاتتىقتىڭ ارقاسىندا ەلىمىز جاڭا بەلەستەرگە قادام باستى. تاۋەلسىزدىگىن جاريالاعاننان كەيىن عانا قازاقستان ديپلوماتيالىق تۇرعىدان مويىندالىپ، حالىقارالىق قاۋىمداستىقتىڭ تولىققاندى مۇشەسى رەتىندە تانىلا باستالدى. تاۋەلسىزدىك بارىنەن قىمبات! ونى تابىستى ءارى باقۋاتتى مەملەكەتتىڭ تىرەگى سانالاتىن قاستەرلى قۇندىلىق رەتىندە كوزدىڭ قاراشىعىنداي ساقتاۋ - اتا- بابالارىمىزدىڭ جانە كەلەر ۇرپاقتىڭ الدىنداعى قاسيەتتى بورىشىمىز.
قازاقستان ستراتەگيالىق باعىتىنان اينىماي، مەملەكەتتىلىك ءداستۇرىن دايەكتى تۇردە دامىتىپ كەلەدى. بارلىق سالادا قولعا الىنعان اۋقىمدى وزگەرىستەر سان عاسىرلىق ءتول شەجىرەمىزدىڭ جاڭا پاراعىن اشتى. ءبىز بارشاعا بىردەي مۇمكىندىك بەرىپ، ءوسىپ- وركەندەۋگە جول اشاتىن ادىلەتتى قازاقستاندى قۇرىپ جاتىرمىز. قوعامدا بىرلىك پەن تۇراقتىلىق، زاڭ مەن ءتارتىپ، جاۋاپكەرشىلىك پەن ىنتىماق، ءبىلىمپازدىق پەن ەڭبەكقورلىق سياقتى قۇندىلىقتار بەرىك ورنىقسا، وسى ماقساتقا قول جەتكىزەتىنىمىز انىق.
بارشاڭىزعا زور دەنساۋلىق، باق- بەرەكە جانە تولاعاي تابىس تىلەيمىن!
كوك تۋىمىز ماڭگى جەلبىرەي بەرسىن!
تاۋەلسىزدىگىمىز باياندى بولسىن!» - دەپ جازىلعان قۇتتىقتاۋ ماتىنىندە.
اۆتور
ەلميرا ورالبايەۆا
