مەملەكەت باسشىسى قاراعاندى وبلىسىنىڭ اكىمى ەرماعانبەت بولەكپايەۆتى قابىلدادى
پرەزيدەنتكە قاراعاندى وبلىسىنىڭ 2023 -جىلعى الەۋمەتتىك- ەكونوميكالىق دامۋ قورىتىندىسى تۋرالى ەسەپ بەرىلدى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
ەرماعانبەت بولەكپايەۆ بايانداعانداي، بىلتىر 11 ايدىڭ ىشىندە وڭىردەگى ونەركاسىپ ءونىمىنىڭ كولەمى 3,1 تريلليون تەڭگە بولعان. نەگىزگى كاپيتالعا سالىنعان ينۆەستيتسيا 16,3 پايىزعا ارتىپ، 727 ميلليارد تەڭگەگە جەتكەن. وڭدەۋ ونەركاسىبى سالالارىندا: ماشينا جاساۋ ىسىندە %45، جەڭىل ونەركاسىپتە %23,9، فارماتسيەۆتيكادا %20 وسىمگە قول جەتكىزىلگەن.
قاعاز ونەركاسىبىندە، قۇرىلىس يندۋسترياسى مەن قارا مەتاللۋرگيادا ءوسىم بايقالادى. شاعىن جانە ورتا بيزنەس سالاسىندا 100 مىڭنان استام كومپانيا قىزمەت ەتەدى جانە بۇل باعىتتا وڭىردەگى بەلسەندى حالىقتىڭ 45 پايىزى جۇمىس ىستەيدى. كاسىپكەرلەر ءۇشىن بولشەك سالىقتىڭ مولشەرى %4- دان %2- عا دەيىن تومەندەگەن. بيىل جالپى وڭىرلىك ونىمدەگى شاعىن جانە ورتا بيزنەستىڭ ۇلەسىن %19- دان %25- عا ارتتىرۋ جوسپارلانعان؛ ەكونوميكانىڭ بارلىق سالاسىندا 25 مىڭنان استام جۇمىس ورنى اشىلىپ، جۇمىسسىزدىق دەڭگەيى %4,1- عا، كەدەيلىك دەڭگەيى %2,7- عا دەيىن تومەندەگەن؛ حالىقتىڭ ناقتى تابىسى %4,7- عا كوبەيگەن. اۋىلداردا 92 دەنساۋلىق ساقتاۋ نىسانىنىڭ قۇرىلىسى، ەكى اۋدانارالىق اۋرۋحانانى جاڭعىرتۋ جۇمىستارى باستالعان. بيىل «جايلى مەكتەپ» جوباسى اياسىندا وڭىردە 7100 ورىندىق 10 مەكتەپ پايدالانۋعا بەرىلمەك.
بۇدان بولەك، پرەزيدەنتكە جىلىتۋ ماۋسىمىنىڭ بارىسى، Qarmet كاسىپورنىنداعى قازىرگى جاعداي تۋرالى باياندالدى.
مەملەكەت باسشىسىنا جاڭا ينۆەستوردىڭ ءوندىرىستى تۇراقتاندىرۋ جانە ونىڭ كولەمىن ارتتىرۋ باعىتىندا قابىلداپ جاتقان شارالارى، سونداي- اق ءوندىرىستى جاڭعىرتۋ جانە كومپانيا جۇمىسشىلارىنىڭ ەڭبەك قاۋىپسىزدىگىن قامتاماسىز ەتۋ جوسپارى جونىندە مالىمەت بەرىلدى.
سونىمەن بىرگە ە. بولەكپايەۆ الەۋمەتتىك سالانىڭ جاي-كۇيى، «اۋىل - ەل بەسىگى» جانە «اۋىل اماناتى» جوبالارىنىڭ ىسكە اسىرىلۋى تۋرالى دا باياندادى.
قاسىم- جومارت توقايەۆ وبلىستى ودان ءارى دامىتۋ جانە تۇرعىنداردىڭ ءال- اۋقاتىن جاقسارتۋ جونىندە ءبىرقاتار تاپسىرما بەردى. سونداي- اق Qarmet كومپانياسىنا قاراستى نىساندارداعى جاعدايدى ەرەكشە باقىلاۋعا الۋ قاجەت ەكەنىن اتاپ ءوتتى.
اۆتور
ەلميرا ورالبايەۆا
