مەملەكەت باسشىسى ەنەرگەتيكا ءمينيسترى ەرلان اقكەنجەنوۆتى قابىلدادى
استانا. KAZINFORM - قاسىم-جومارت توقايەۆقا ەلىمىزدەگى وتىن-ەنەرگەتيكا كەشەنىنىڭ جاي-كۇيى، نەگىزگى جوبالاردى ىسكە اسىرۋ بارىسى مەن سالانى ودان ءارى دامىتۋ جوسپارى تۋرالى ەسەپ بەرىلدى.
پرەزيدەنتكە وتاندىق مۇناي وڭدەۋ زاۋىتتارىنىڭ قالىپتى جۇمىس ىستەپ تۇرعانى جونىندە باياندالدى. بيىل مۇناي وڭدەۋ كولەمىن 17,6 ميلليون تونناعا جەتكىزۋ جوسپارلانىپ وتىر. سونداي-اق مينيستر مۇناي وڭدەۋ سالاسىن دامىتۋدىڭ 2040 -جىلعا دەيىنگى تۇجىرىمداماسى ازىرلەنىپ جاتقانىن مالىمدەدى.
ەرلان اقكەنجەنوۆ گاز ءوندىرۋ، قاشاعان، قاراشىعاناق كەن ورىندارىندا جانە جاڭاوزەن قالاسىندا جاڭا گاز وڭدەۋ زاۋىتتارىن سالۋ جوسپارىن تانىستىردى. «بەينەۋ - بوزوي - شىمكەنت» ماگيسترالدى گاز قۇبىرىنىڭ ەكىنشى جەلىسى جانە «تالدىقورعان -ءۇشارال» گاز قۇبىرىنىڭ قۇرىلىسى جالعاسىپ جاتىر. قاسىم-جومارت توقايەۆقا قۋاتى 26 گيگاۆاتتان اساتىن جاڭا گەنەراتسيالاۋ كەشەندەرىن ىسكە قوسۋ كوزدەلىپ وتىرعانى ايتىلدى. بۇل 2035 -جىلعا قاراي ىشكى سۇرانىستى وتەۋ ماقساتىندا قولعا الىندى.
كەزدەسۋ سوڭىندا پرەزيدەنت وتىن-ەنەرگەتيكا سەكتورىن ودان ءارى دامىتۋ بويىنشا ءبىرقاتار تاپسىرما بەردى. مەملەكەت باسشىسى مۇناي-گاز، مۇناي-گاز حيمياسى جانە ەلەكتر ەنەرگەتيكاسى سالالارىندا جوسپارلانعان ينفراقۇرىلىمدىق جوبالاردى ۋاقتىلى ءارى ساپالى ىسكە اسىرۋدىڭ ماڭىزىن اتاپ ءوتتى. قاسىم-جومارت توقايەۆ ەلدىڭ ەنەرگەتيكالىق قاۋىپسىزدىگىن ساقتاۋعا، تۇرعىندار مەن وندىرىستىك نىسانداردى قۋات كوزىمەن تۇراقتى قامتاماسىز ەتۋگە باسا نازار اۋدارۋ قاجەت دەپ سانايدى. پرەزيدەنت ينۆەستيتسيالىق كليماتتى جاقسارتۋ ءۇشىن كەشەندى شارالار قابىلداۋ، گەولوگيالىق بارلاۋعا ستراتەگيالىق ينۆەستورلاردى تارتۋ مىندەتتەرىن جۇكتەدى.
بۇعان دەيىن ونەركاسىپ ءمينيسترى پرەزيدەنتتى ۆەدومستۆونىڭ الداعى جوسپارلارىمەن تانىستىردى.
