مەملەكەت باسشىسى: ۇلۋ جىلى ۇلتىمىز ءۇشىن ماڭىزدى وقيعالارعا تولى بولدى

استانا. KAZINFORM - پرەزيدەنت قاسىم-جومارت توقايەۆ قازاقستاندىقتاردى جاڭا جىل مەرەكەسىمەن قۇتتىقتاي وتىرىپ، ەل جەتىستىكتەرىن اتاپ ءوتتى.

- ۇلۋ جىلى ۇلتىمىز ءۇشىن ماڭىزدى وقيعالارعا تولى بولدى. ءتۇرلى سالاداعى رەفورمالار جەمىسىن بەرە باستادى. ەكونوميكانىڭ جاڭا باعدارىن بەلگىلەپ، ناقتى شارالاردى قولعا الدىق. وڭدەۋ ونەركاسىبى قارقىندى دامىپ كەلەدى. ءبىرقاتار ءىرى ءوندىرىس ورنى اشىلدى. ينۆەستيتسيالىق احۋال جاقساردى. مىڭداعان شاقىرىم جول سالىنىپ، جوندەلدى. ەلىمىزدەگى ەڭ ۇزىن كوپىردىڭ قۇرىلىسى اياقتالىپ، حالىق يگىلىگىنە بەرىلدى. ديقاندارىمىز مول استىق جيناپ، قامبانى دانگە تولتىردى، - دەدى مەملەكەت باسشىسى.

سونداي-اق «تازا قازاقستان» اكسياسىنىڭ اياسىندا قالالار مەن اۋىلدار جاڭاشا كەلبەتكە يە بولا باستاعانىن ايتتى. العاش رەت ازاماتتارىمىزدىڭ ورتاشا ءومىر ءسۇرۋ ۇزاقتىعى 75 جاسقا جەتكەنىن، ۇلتتىق قورداعى قارجىنىڭ ءبىر بولىگى بالالاردىڭ ەسەپشوتىنا تۇسكەنىن، ەلىمىزدىڭ كەلەشەگى ءۇشىن وتە ماڭىزدى شەشىم قابىلدانعانىن اتاپ ءوتتى.

- پارلامەنت دەپۋتاتتارى قوعامداعى وزەكتى ماسەلەلەر بويىنشا زاڭدار قابىلدادى. سونداي-اق، بيىل ءبىز ەلىمىزدىڭ كەلەشەگىنە ايرىقشا اسەر ەتەتىن وتە ماڭىزدى شەشىم قابىلدادىق. اتوم ەلەكتر ستانتسياسىنا قاتىستى رەفەرەندۋم وتكىزدىك. كوپشىلىك بۇل باستاماعا قولداۋ ءبىلدىردى، - دەدى پرەزيدەنت.

مەملەكەت باسشىسى استانادا بەدەلدى حالىقارالىق ۇيىمداردىڭ ماڭىزدى سامميتتەرى وتكەنىن دە ەسكە سالدى. دۇنيەجۇزىلىك كوشپەندىلەر ويىندارىنا مىڭداعان سپورتشىلار مەن مەيماندار كەلىپ، بايراقتى باسەكەنى تابىستى ۇيىمداستىرىپ، ءتول وركەنيەتىمىزدى جەر جۇزىنە تانىتقانىمىزدى اتاپ ءوتتى. ەل تۇرعىندارىنىڭ تابيعي اپات كەزىندەگى اۋىرتپالىقتى جۇمىلا كوتەرگەنىنە توقتالدى.

- بيىل كوكتەمدە ءبىرقاتار ايماقتا الاپات تاسقىن بولعانىن بىلەسىزدەر. تابيعاتتىڭ توسىن سىناعى بارىمىزگە اۋىر تيگەنى ءسوزسىز. سوعان قاراماستان، قيىن كۇندەردە حالقىمىز ءبىر- بىرىنە جاناشىر بولىپ، مىزعىماس بىرلىگىن كورسەتتى. زارداپ شەككەن بارشا ازاماتقا جان-جاقتى كومەك بەرىلدى. مەملەكەت ەشكىمدى نازاردان تىس قالدىرعان جوق. بارلىق مىندەتتەمەسىن تولىق ورىندادى. جۇزدەگەن وتباسى جاڭا جىلدى جاڭا شاڭىراقتا قارسى الىپ جاتىر. ءبىز وسىلايشا ىرىستى ىنتىماعىمىزدىڭ ارقاسىندا بارلىق قيىندىقتى ەڭسەرەمىز. العا سەنىممەن قادام باسامىز، - دەدى مەملەكەت باسشىسى.

پرەزيدەنت قۇتتىقتاۋىنىڭ تولىق ءماتىنىن مىنا سىلتەمە ارقىلى وقي الاسىز.