مەملەكەت باسشىسى كۋۆەيتتىڭ تاق مۇراگەرىمەن كەزدەستى

استانا. KAZINFORM - قاسىم-جومارت توقايەۆ СOP29 دۇنيەجۇزىلىك كليمات سامميتى اياسىندا كۋۆەيتتىڭ تاق مۇراگەرى، شەيح ساباح حاليد ءال-حاماد اس-ساباحپەن كەزدەسۋ وتكىزدى، دەپ حابارلايدى اقوردا.

مەملەكەت باسشىسى كۋۆەيتتى قازاقستاننىڭ اراب الەمىندەگى ماڭىزدى سەرىكتەسى رەتىندە اتاپ ءوتتى.

پرەزيدەنت ەكى ەل اراسىندا تۇراقتى ساياسي ديالوگ پەن ەكونوميكالىق ىقپالداستىق دامىپ كەلە جاتقانىنا نازار اۋدارىپ، قازاقستاننىڭ كۋۆەيتپەن جان-جاقتى ىنتىماقتاستىقتى ودان ءارى نىعايتۋعا بەيىل ەكەنىن راستادى.

سونىمەن قاتار قاسىم-جومارت توقايەۆ كۋۆەيتتىڭ قازاقستان ەكونوميكاسىنا قارجى قۇياتىن ءىرى ينۆەستوردىڭ بىرىنە اينالۋعا الەۋەتى مول ەكەنىنە سەنىم ءبىلدىرىپ، ەلىمىزدە ءبىرقاتار كۋۆەيت كومپانياسىنىڭ تابىستى جۇمىس ىستەپ جاتقانىن مىسالعا كەلتىردى.

قاسىم-جومارت توقايەۆ پەن شەيح ساباح حاليد ءال-حاماد اس-ساباح بىرلەسكەن ينۆەستيتسيالىق جوبالارعا باسا ءمان بەرە وتىرىپ، ساۋدا-ەكونوميكالىق بايلانىستاردى جانداندىرا ءتۇسۋ جونىندە ۋاعدالاستى.

اڭگىمەلەسۋ بارىسىندا كوپجاقتى قۇرىلىمدار اياسىنداعى، سونىڭ ىشىندە ورتالىق ازيا - شىعاناقتاعى اراب مەملەكەتتەرىنىڭ ىنتىماقتاستىعى كەڭەسى فورماتىنداعى ىقپالداستىققا باسىمدىق بەرىلدى.

كەزدەسۋ سوڭىندا قاسىم-جومارت توقايەۆ كۋۆەيت ءامىرى ميشاال ءال-احماد ءال-دجابەر اس-ساباحتى قازاقستانعا ساپارمەن كەلۋگە شاقىردى.

ەسكە سالايىق، بۇگىن پرەزيدەنت قاسىم-جومارت توقايەۆ دۇنيەجۇزىلىك كليمات سامميتىنە قاتىسۋ ءۇشىن باكۋدەگى وليمپيادالىق ستاديونعا باردى. سوسىن مەملەكەت باسشىسى باكۋدەگى دۇنيەجۇزىلىك كليمات سامميتىندە ءسوز سويلەدى.

اۆتور

ساياگۇل جارىلقاسىن