مەملەكەت باسشىسى كونستيتۋتسيا كۇنىمەن قۇتتىقتادى
استانا. KAZINFORM - مەملەكەت باسشىسى قاسىم-جومارت توقايەۆتىڭ كونستيتۋتسيا كۇنىمەن قۇتتىقتادى، دەپ حابارلايدى اقوردا.
«قۇرمەتتى وتانداستار!
بارشاڭىزدى كونستيتۋتسيا كۇنىمەن قۇتتىقتايمىن! اتا زاڭ - مەملەكەتتىلىگىمىزدىڭ بەرىك تۇعىرى، ەلىمىزدىڭ دايەكتى ءارى تۇراقتى دامۋىنىڭ مىزعىماس كەپىلى. مەملەكەت پەن قوعام ءومىرىنىڭ نەگىزىن ايقىندايتىن كونستيتۋتسيادا ازاماتتاردىڭ مۇددەسىنە، قۇقىعى مەن بوستاندىعىنا ايرىقشا نازار اۋدارىلعان. سوندىقتان قازاقستاندا جۇزەگە اسىرىلىپ جاتقان بارلىق اۋقىمدى وزگەرىستىڭ ماقساتى - حالىقتىڭ ءال- اۋقاتىن جاقسارتۋ. 2022 -جىلعى كونستيتۋتسيالىق رەفورمانىڭ ناتيجەسىندە جان- جاقتى دەموكراتيالاندىرۋ ۇدەرىسى باستالدى، ساياسي جۇيەنى جاڭعىرتۋعا جاعداي جاسالدى.
قۇقىق قورعاۋ ينستيتۋتتارىنىڭ جانە ادام قۇقىقتارى جونىندەگى ۋاكىلدىڭ مارتەبەسى كوتەرىلدى. سونداي-اق كونستيتۋتسيالىق سوت قۇرىلدى. بۇل مەكەمە قازىر ەلىمىزدە زاڭ ۇستەمدىگىن ورنىقتىرۋعا بارىنشا ىقپال ەتىپ وتىر. كونستيتۋتسيانىڭ ءادىل ءارى بەرەكەلى قوعامنىڭ تىرەگى سانالاتىن زاڭ مەن ءتارتىپتى قامتاماسىز ەتۋ جولىنداعى ءرولى نىعايا ءتۇستى.
ازاماتتاردىڭ نەگىزگى زاڭىمىزدى قۇرمەتتەپ، ونىڭ تالاپتارىن بۇلجىتپاي ورىنداۋى - ناعىز وتانشىلدىقتىڭ جانە جوعارى جاۋاپكەرشىلىكتىڭ ايقىن كورىنىسى. ءبىز كونستيتۋتسيادا بەكىتىلگەن قاستەرلى قۇندىلىقتارعا سۇيەنە وتىرىپ، بارشاعا بىردەي مۇمكىندىك بەرەتىن ادىلەتتى قازاقستاندى بىرگە قۇراتىنىمىزعا كامىل سەنەمىن. ءار شاڭىراققا باق- بەرەكە، تولايىم تابىس تىلەيمىن!»، - دەلىنگەن قۇتتىقتاۋ ماتىنىندە.
