مەملەكەت باسشىسى جالعان ستاتيستيكانى تۇبىرىمەن جويۋدى تاپسىردى

استانا. KAZINFORM - مەملەكەت باسشىسى قاسىم- جومارت توقايەۆ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا سالاداعى جالعان ستاتيستيكانى تۇبىرىمەن جويۋدى تاپسىردى.

«مەنىڭ تاپسىرمام بويىنشا اۋىل شارۋاشىلىعىنداعى ستاتيستيكانى بۇرمالاۋ، جالعان قۇجات تولتىرۋ، كوزبوياۋشىلىق فاكتىلەرىن ءتۇپ-تامىرىمەن جويۋ جۇمىستارى جۇرگىزىلىپ جاتىر. وسىنىڭ ناتيجەسىندە ءبىز سالانىڭ ناقتى جاعدايىن باعامداي الامىز، ەكونوميكالىق شىعىنعا سوقتىراتىن ءتيىمسىز شەشىم قابىلدامايمىز»، - دەدى پرەزيدەنت.

قاسىم-جومارت توقايەۆ سۋبسيديا ءبولۋدى اشىق ەتە ءتۇسۋ كەرەكتىگىن دە ەسكە سالدى.

«ۇكىمەت سۋبسيديا بەرۋدىڭ اشىقتىعىن تولىق قامتاماسىز ەتىپ، سالانى نارىقتىق ءادىس-تاسىلدەر ارقىلى نىعايتۋدى قولعا الۋى قاجەت. بۇل سالادا ستراتەگيالىق تۇرعىدان سەنىمدى ءارى مۇقيات ويلاستىرىلعان مەملەكەتتىك رەتتەۋ تەتىكتەرىنە كوشۋ ماڭىزدى»، - دەدى پرەزيدەنت.

قاسىم-جومارت توقايەۆ ۇكىمەتكە ديقانداردى ەلىمىزدە وندىرىلگەن تۇقىممەن قامتاماسىز ەتۋدى تاپسىردى.

«قازىر جاھاندىق ازىق-تۇلىك نارىعىندا باسەكە كۇشەيىپ كەلەدى. وعان توتەپ بەرۋ ءۇشىن عىلىمدى دامىتۋعا باسا ءمان بەرۋ كەرەك. سونىڭ ىشىندە تۇقىم شارۋاشىلىعىن جانداندىرۋ - ستراتەگيالىق مىندەتتىڭ ءبىرى. كارتوپ پەن قانت قىزىلشاسى بويىنشا وتاندىق تۇقىمنىڭ ۇلەسى 10 پايىزعا دا جەتپەيدى. وسىنداي ماسەلەلەردى شۇعىل شەشۋ قاجەت»، - دەدى پرەزيدەنت.

مەملەكەت باسشىسى بيىل ءداندى-داقىلدار سەلەكسياسى مەن تۇقىم شارۋاشىلىعىن دامىتۋ تۋرالى كەشەندى جوسپار قابىلدانىپ، ناقتى مىندەتتەر قويىلعانىن باسا ايتتى.

«ۇكىمەتكە ديقانداردى ەلىمىزدە وندىرىلگەن تۇقىممەن قامتاماسىز ەتۋدى تاپسىرامىن. بۇل كورسەتكىشتى 2028 -جىلى 80 پايىزعا جەتكىزۋ قاجەت. ال جوعارى ساپالى (ياعني، ەليتالىق) تۇقىمنىڭ ۇلەسى كەمىندە 15 پايىز بولۋى كەرەك. ول ءۇشىن شەتەلدىڭ وزىق تاجىريبەسىن زەرتتەگەن ءجون. مەن جاقىندا فرانسۋز كاسىپكەرلەرىن وسى سالاداعى ينۆەستيتسيالىق جوبالاردى بىرگە جۇزەگە اسىرۋعا شاقىردىم»، - دەدى قاسىم-جومارت توقايەۆ.

كوكتەمگى ەگىس جۇمىستارىنا بولىنەتىن جەڭىلدەتىلگەن نەسيە بيىلعى جەلتوقسان ايىنان باستاپ بەرىلەدى.

«ءبىزدىڭ الدىمىزدا جينالعان ءونىمدى ساقتاۋ جانە ونىڭ باعاسىن قۇلدىراتۋعا جول بەرمەۋ مىندەتى تۇر. ۇكىمەتكە ازىق-تۇلىك كورپوراتسياسى ارقىلى شارۋالاردان استىق ساتىپ الۋدى تاپسىرامىن. بۇل نارىقتاعى باعانى ۇستاپ تۇرۋ ءۇشىن كەرەك. استىقتى وڭىرلەردەگى قويمالاردى بوساتۋ ماقساتىندا اۋىل شارۋاشىلىعى جانە كولىك مينيسترلىكتەرى بيدايدى باسقا وبلىستارعا تاسىمالداۋدى جەدەل قامتاماسىز ەتۋى قاجەت. بۇل ىستە وبلىس اكىمدەرىنىڭ ۇيلەسىمدى جۇمىس ىستەگەنى ماڭىزدى»، - دەدى قاسىم-جومارت توقايەۆ.

پرەزيدەنتتىڭ پايىمىنشا، كوكتەمگى ەگىس پەن كۇزگى جيىن-تەرىن جۇمىستارىن دەر كەزىندە قارجىلاندىرۋ - مول استىق جيناۋدىڭ كەپىلى.

«جىل سايىن تولەمدەردى كەشىكتىرۋ سالدارىنان شارۋالار ەگىن ەگۋ بارىسىندا كوپ قيىندىقتى باستان وتكەرەدى. سوندىقتان مەنىڭ تاپسىرمام بويىنشا كوكتەمگى ەگىس جۇمىستارىنا بولىنەتىن جەڭىلدەتىلگەن نەسيە بيىلعى جەلتوقسان ايىنان باستاپ بەرىلەتىن بولادى. سونىڭ ناتيجەسىندە ديقاندار جانار-جاعارمايدى، قوسالقى بولشەكتەردى، باسقا دا قاجەتتى تاۋارلار مەن قىزمەتتەردى ۋاقىتىندا ساتىپ الا الادى. قازاقستان حالقىنا ارناعان جولداۋىمدا اتالعان سالاعا جەكە ينۆەستيتسيالار تارتۋ كەرەك ەكەنىن ايتقان ەدىم. اگروونەركاسىپ كەشەنىن مەملەكەت تاراپىنان سۋبسيديالاۋدى بىرتىندەپ قىسقارتىپ، ونىڭ ورنىنا بانكتەردىڭ اۋىل شارۋاشىلىعىنا جەڭىلدەتىلگەن نەسيە بەرۋىن ىنتالاندىرعان ءجون. وتاندىق قارجى ينستيتۋتتارى اگروكاسىپورىندارعا ۇزاقمەرزىمدى ءارى قولجەتىمدى قاراجات ۇسىنۋعا ءتيىس»، - دەدى مەملەكەت باسشىسى.

ەسكە سالا كەتەيىك، استانادا اۋىل شارۋاشىلىعى سالاسى قىزمەتكەرلەرىنىڭ فورۋمى ءوتىپ جاتىر.

اۆتور

مارلان جيەمباي