مەملەكەت باسشىسى جاڭادان تاعايىندالعان قورعانىس ءمينيسترىن قابىلدادى
استانا. KAZINFORM - پرەزيدەنت - قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆ قورعانىس ءمينيسترى داۋرەن قوسانوۆتى قابىلدادى.
كەزدەسۋدە مەملەكەت باسشىسى ارميانىڭ جاۋىنگەرلىك دايىندىعىن نىعايتۋ، باسقارۋ جۇيەسىنە تسيفرلىق شەشىمدەردى ەنگىزۋ، ارنايى وپەراتسيالار كۇشتەرىنىڭ مۇمكىندىگىن كەڭەيتۋ، الەۋمەتتىك جانە يدەولوگيالىق جۇمىستىڭ تيىمدىلىگىن ارتتىرۋ، سونداي-اق اسكەري ينفراقۇرىلىمدى جاڭعىرتۋ بويىنشا ناقتى مىندەتتەر جۇكتەدى.
ەسكە سالا كەتەيىك، بۇعان دەيىن پرەزيدەنتتىڭ جارلىعىمەن رۋسلان فاتيح ۇلى جاقسىلىقوۆ قورعانىس ءمينيسترى لاۋازىمىنان بوساتىلعانىن جازعان ەدىك. بۇل لاۋازىمعا مەملەكەت باسشىسىنىڭ جارلىعىمەن داۋرەن جۇماتاي ۇلى قوسانوۆ تاعايىندالدى.
**
داۋرەن جۇماتاي ۇلى قوسانوۆ - 1969 -جىلى پاۆلودار وبلىسىندا دۇنيەگە كەلگەن.
1990 -جىلى ارماۆير جوعارى اسكەري اۆياتسيالىق ۇشقىشتار ۋچيليشەسىن اياقتاعان. سودان كەيىن اسكەري-اۋە اكادەمياسىنا وقۋعا تۇسكەن. اتاپ ايتقاندا يۋ. ا. گاگارين اتىنداعى اسكەري-اۋە اكادەمياسىن 2005 -جىلى اياقتاعان بولسا، رەسەي فەدەراتسياسى قارۋلى كۇشتەرى باس شتابىنىڭ اسكەري اكادەمياسىن 2013 -جىلى ءتامامداعان.
قىزمەتىن ءۇشارال جاۋىنگەرلىك پولكىنەن باستاعان. سودان كەيىن تالدىقورعانداعى «سۋ-27» ەسكادريلياسىنىڭ كومانديرى، قاراعاندى اۆيابازاسى شتابىنىڭ باستىعى، شىمكەنت اۆيابازاسىنىڭ كومانديرى بولعان.
ال 2013 -جىلى قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرى اسكەري-اۋە كۇشتەرىنىڭ قولباسشىسى بولىپ تاعايىندالعان.
2019 -جىلى بۇل قىزمەتىنەن بوساتىلىپ، اقتوبە قالاسىنداعى اۋە قورعانىسى كۇشتەرى اسكەري ينستيتۋتىنىڭ باستىعى بولىپ تاعايىندالعان.
2022 -جىلدىڭ قازانىندا قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرى باس شتابى باستىعىنىڭ ءبىرىنشى ورىنباسارى، ال ەكى ايدان سوڭ، اۋە قورعانىسى كۇشتەرىنىڭ باس قولباسشىسى بولىپ تاعايىندالعان.
2024 -جىلى وعان اۆياتسيا گەنەرال- لەيتەنانتى اتاعى بەرىلگەن.
2024 -جىلعى 28 -قىركۇيەكتە مەملەكەت باسشىسىنىڭ وكىمى بويىنشا قازاقستان رەسپۋبليكاسى قورعانىس ءمينيسترىنىڭ ورىنباسارى - قارۋلى كۇشتەرى اۋە قورعانىسى كۇشتەرىنىڭ باس قولباسشىسى بولىپ تاعايىندالدى.
