مۇلىكتى بولىسكىسى كەلمەگەن – ب ق و-دا ايەل كۇيەۋىن ولتىرۋگە كيللەر جالداعان

استانا. KAZINFORM – ب ق و-دا پوليتسيا تاپسىرىسپەن كىسى ءولتىرۋ قىلمىسىنىڭ الدىن الدى، دەپ حابارلايدى Polisia.kz سايتى.

ءوڭىردىڭ ۇيىمداسقان قىلمىسقا قارسى كۇرەس باسقارماسىنىڭ جەدەل ۋاكىلدەرى شۇعىل تۇردە ارەكەت ەتىپ، قىلمىسقا جول بەرمەدى. قىلمىستى ۇيىمداستىردى دەگەن كۇدىكپەن ب ق و-نىڭ ەكى تۇرعىنى ۇستالدى. قىلمىسقا تاپسىرىس بەرۋشى كۇيەۋىمەن مۇلىكتى بولىسكىسى كەلمەيتىن ايەل ەكەنى انىقتالدى.

كۇدىكتىلەردەن ولاردىڭ كىناسىن راستايتىن زاتتاي دالەلدەمەلەر تاركىلەندى. تەرگەۋ مالىمەتتەرى بويىنشا، قارۋدى ساتىپ الۋ جانە كىسى ءولتىرۋدى ورىنداۋ ءۇشىن تاپسىرىس بەرۋشى ۇيىمداستىرۋشىعا 1,3 ميلليون تەڭگە بەرگەن. كۇدىكتىلەر ۇستالدى، سوتتىڭ سانكسياسىمەن ولارعا قاتىستى «قاماۋدا ۇستاۋ» بۇلتارتپاۋ شاراسى تاڭدالدى.

قىلمىستىق ءىس كىسى ولتىرۋگە وقتالۋ فاكتىسى بويىنشا تەرگەلىپ جاتىر. كۇدىكتىلەر 20 جىلعا دەيىن باس بوستاندىعىنان ايىرىلۋى مۇمكىن.

قازىر جابىرلەنۋشىنىڭ ومىرىنە ەشقانداي قاۋىپ جوق.

تەرگەۋ مۇددەسى ءۇشىن وزگە مالىمەتتەر جاريا ەتىلمەيدى.

 

اۆتور

ەربول جانات