مەكتەپكە 500 مىڭنان استام بالانى دايارلاۋعا قاراجات ءبولىندى

استانا. KAZINFORM - اكىمدىكتەر 500 مىڭنان استام بالانى مەكتەپكە دايارلاۋ ءۇشىن قاراجات ءبولدى. بۇل تۋرالى وقۋ- اعارتۋ مينيسترلىگى بالا قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا ايتتى.

«جىل سايىن قولداۋدى قاجەت ەتەتىن وتباسى بالالارىنا مەكتەپتەر ارقىلى ماتەريالدىق كومەك كورسەتىلەدى. بۇل شارانىڭ نەگىزگى ماقساتى - مۇقتاج اتا-انالارعا بالالارىن مەكتەپكە دايىنداۋ ءۇشىن قولداۋ كورسەتۋ. ماتەريالدىق كومەك كيىم-كەشەك، ونىڭ ىشىندە مەكتەپ فورماسى، اياق كيىم، وقۋ قۇرالدارىن ساتىپ الۋ ءۇشىن بولىنەدى. وسى ماقساتتا اكىمدىكتەر 500 مىڭنان استام بالانى مەكتەپكە دايارلاۋ ءۇشىن ءتيىستى قاراجاتتى ءبولدى»، - دەدى كوميتەت ءتوراعاسى ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، ماتەريالدىق كومەك كولەمى بارلىق ءوڭىر ءۇشىن سوڭعى ءۇش جىلدا 2,5-كە ارتتى.

ناقتى ايتقاندا، 17 مىڭنان، 43 مىڭ تەڭگەگە ءوسىپ وتىر.

«قازىرگى تاڭدا وڭىرلەر مەكتەپ جيناقتارىن ساتىپ الۋ ءۇشىن اتا-اناسىنىڭ نەمەسە ولاردى الماستىراتىن تۇلعالاردىڭ ەسەپشوتىنا قاراجاتتى اۋدارۋدى باستادى. اتا-انالار قاجەتتى تاۋارلاردى ساتىپ العاننان كەيىن ونى راستايتىن قۇجاتتى ۇسىنۋلارى كەرەك. ماتەريالدىق كومەكتى الۋ ءۇشىن ءار اتا-انا مەكتەپ ديرەكتورىنىڭ اتىنا ءوتىنىش جازادى. بۇگىندە اتا-انالاردىڭ ەسەپشوتىنا 3 ميلليارد تەڭگەدەن استام قاراجات اۋدارىلدى، 77 مىڭنان استام بالا قامتىلدى»، - دەدى ناسىمجان وسپانوۆا.

اۆتور

مارلان جيەمباي