مۇگەدەك بولسا دا ءتىرى جۇرگەنى جاقسى: اقتاۋدا ازەربايجاندىق ازامات ۇشاق اپاتىنان زارداپ شەككەن تۋىسىن تاپپاي ءجۇر

اقتاۋ. KAZINFORM - سافار نابيەۆ اقتاۋعا بۇگىن كەلگەن. ول اپاتقا ۇشىراعان ۇشاقتا بولعان جەڭگەسىن ىزدەيدى. ايتۋىنشا، تۋىسى ءتىرى قالعانداردىڭ دا، قازا تاپقانداردىڭ دا اراسىندا جوق.

- مەن نەمەرە اعامنىڭ جۇبايى، جەڭگەمدى ىزدەپ كەلدىم. جاسى 42 دە. ەكى بالاسى بار. ول شەشەنستانعا قىزىنا بارا جاتقان ەدى.

جەڭگەم بورتتا بولعانداردىڭ تىزىمىندە تۇر. ءبىراق، قازا تاپقاندار مەن ءتىرى قالعانداردىڭ اراسىنان تاپپاي جاتىرمىز. مۇگەدەك بولسادا كوز الدىمىزدا ءتىرى بولعانى جاقسى عوي، ءۇمىتىمىزدى ۇزبەيمىز، - دەيدى ازەربايجان ازاماتى.

ايتا كەتەيىك، ماڭعىستاۋ وبلىستىق كوپبەيىندى اۋرۋحانادا ۇشاقتان زارداپ شەككەن 19 ادام ەمدەلۋدە. 1 ناۋقاستىڭ جەكە باسى ءالى انىقتالماعان. سەبەبى، ايەلدىڭ بەت الپەتى قاتتى جاراقاتتانعان ءارى، قۇجاتى تابىلماعان.

ءبىراق، دارىگەرلەردىڭ ايتۋىنشا، ايەل شامامەن 60 جاستا.

بۇعان دەيىن، ۇشاق اپاتىنان زارداپ شەككەن ناۋقاستاردىڭ باس سۇيەكتەرى مەن وكپەلەرى جاراقاتتانعانىن جازعان بولاتىنبىز.

اياگوز ءىزباساروۆا

اۆتور