مايمىل شەشەگىنە قارسى ۆاكسينالاۋ جۇرگىزىلمەيدى - ە و

استانا. KAZINFORM - ەۋروپالىق دەنساۋلىق ساقتاۋ ورگاندارى مايمىل شەشەگى ۆيرۋسىنىڭ جاڭا نۇسقاسىمەن كۇرەسۋدە قوسىمشا شارالار قابىلداۋدان باس تارتىپ وتىر.

Euronews حابارلاعانداي، ەۋروپاداعى قالىڭ جۇرتشىلىق ءۇشىن اۋرۋدىڭ قاۋپى تومەن دەپ باعالانىپ وتىر. ەۋروپالىق وداق شەكارالىق باقىلاۋدا نەمەسە قاۋىمداستىق دەڭگەيىندە ۆاكسينالاۋ سياقتى قوسىمشا شارالار قاجەت دەپ سانامايدى.

ەۋروكوميسسيانىڭ دەنساۋلىق ساقتاۋ قاۋىپسىزدىگى جونىندەگى كوميتەتى ەۋروپالىق اۋرۋلاردىڭ الدىن الۋ جانە باقىلاۋ ورتالىعى مەن ەۋروپالىق ءدارى-دارمەك اگەنتتىگىنىڭ ساراپشىلارىمەن كەزدەسۋدەن كەيىن وسىنداي قورىتىندىعا كەلدى.

كەزدەسۋ بەينەكونفەرەنسيا تۇرىندە جانە دۇنيەجۇزىلىك دەنساۋلىق ساقتاۋ ۇيىمى مەن افريكانىڭ اۋرۋلاردى باقىلاۋ ورتالىعى وكىلدەرىنىڭ قاتىسۋىمەن ءوتتى.

ەۋروكوميسسيا وكىلىنىڭ Euronews-كە حابارلاۋىنشا، قوعامدىق دەنساۋلىق جاعدايى قازىرگى ۋاقىتتا شۇعىل شارالاردى قاجەت ەتپەيدى. دەگەنمەن، كوميتەت ۇيلەستىرىلگەن ءتاسىلدىڭ ماڭىزدىلىعىن جانە جاعدايدى مۇقيات باقىلاۋدى جالعاستىرۋ قاجەتتىگىن اتاپ ءوتتى.

وتكەن اپتادا دۇنيەجۇزىلىك دەنساۋلىق ساقتاۋ ۇيىمى كونگو دەموكراتيالىق رەسپۋبليكاسى مەن كورشىلەس افريكا ەلدەرىندەگى ىندەتكە بايلانىستى مايمىل شەشەگى (mpox) اۋرۋىن حالىقارالىق دەڭگەيدەگى دەنساۋلىق ساقتاۋ سالاسىنداعى توتەنشە جاعداي دەپ جاريالادى.

اۋرۋلاردىڭ الدىن الۋ جانە باقىلاۋدىڭ ەۋروپالىق ورتالىعى سونىمەن قاتار ۆيرۋستىڭ افريكادا تارالۋىنا بايلانىستى مايمىل شەشەگىن سىرتتان اكەلۋ جاعدايلارىنىڭ جوعارىلاۋ قاۋپى بار ەكەنىن ەسكەرتتى. ساراپشىلار ەۋروپادا ۆيرۋستىڭ اسەرى ءالى دە از دەپ سانايدى، ءبىراق حالىقتىڭ حاباردار بولۋىن ارتتىرۋدى، تەستىلەۋ جۇرگىزۋ جانە ناۋقاستاردىڭ بايلانىستا بولعان ادامداردى انىقتاۋدى ۇسىنادى.

ماماندار مايمىل شەشەگى ۆيرۋسى تەك اۋرۋ جانۋارلاردان عانا ەمەس، ادامنان ادامعا جىنىستىق قاتىناس نەمەسە اۋا- تامشىلى جولمەن جۇعۋى مۇمكىن ەكەنىن ەسكەرتەدى. ورامال نەمەسە توسەك-ورىن سياقتى ۆيرۋسپەن لاستانعان زاتتار دا قاۋىپتى سانالادى.

اۆتور

زارينا تۋعانبايەۆا