ماسكەۋدەگى قازاق دياسپوراسىنىڭ جەتەكشىسىنە قاتىستى قىلمىستىق ءىس قوزعالدى

رەسەيدىڭ تەرگەۋ كوميتەتى قوعام بەلسەندىسى، ماسكەۋدەگى قازاق دياسپوراسىنىڭ مۇشەسى پولات جامالوۆقا قاتىستى قىلمىستىق ءىس قوزعادى، دەپ حابارلايدى Kazinform ءتىلشىسى.

رەسەيدىڭ «ۆەرستكا» تەلەگرام- ارناسىنىڭ حابارلاۋىنشا، بۇل تۋرالى تەرگەۋ كوميتەتىنىڭ جابىق ەسەبىنە ارنالعان اقپاراتتىق انىقتامادا ايتىلعان. 2023 -جىلدىڭ 11-قىركۇيەگىندە ماسكەۋ قالاسىنىڭ سولتۇستىك-شىعىس اكىمشىلىك وكرۋگىنىڭ اسا ماڭىزدى ىستەردى تەرگەۋ ءبولىمىنىڭ تەرگەۋشىسى رەسەي فەدەراتسياسى قىلمىستىق كودەكسىنىڭ 207.3-بابىنىڭ 1-بولىگى (رەسەي فەدەراتسياسىنىڭ قارۋلى كۇشتەرىن پايدالانۋ تۋرالى جالعان اقپاراتتى جاريا ەتۋ) بويىنشا قىلمىستىق ءىس قوزعادى.

قىلمىستىق ءىستىڭ قوزعالۋىنا پولات جامالوۆتىڭ Facebook الەۋمەتتىك جەلىسىندەگى پاراقشاسىنداعى حابارلاما سەبەپ بولدى، وندا اۆتور رەسەي فەدەراتسياسىنىڭ قارجى مينيسترلىگى باسشىلىعىنىڭ ر ف قارۋلى كۇشتەرىنىڭ ارنايى اسكەري وپەراتسياسى كەزىندە قازا تاپقاندار سانىن باعالاۋىنا قىسقاشا تۇسىنىكتەمە بەرگەن.

پولات جامالوۆ ماسكەۋدەگى قازاق دياسپوراسىنىڭ بەدەلدى اقساقالدارىنىڭ ءبىرى رەتىندە تانىمال. ول وتىز جىلدان استام ۋاقىت بويى رەسەيدەگى قازاق مادەنيەتىن، سالت- ءداستۇرىن، ءتىلىن ساقتاۋ مەن دامىتۋعا باعىتتالعان بەلسەندى قوعامدىق قىزمەتپەن اينالىسىپ كەلەدى. وتكەن جىلدارى ماسكەۋ قازاق ولكەلىك ۇلتتىق- مادەني اۆتونومياسىندا، ماسكەۋ قازاق دياسپوراسى قورىندا جانە ماسكەۋ ۇلتتار ۇيىندە باسشىلىق قىزمەتتەردى اتقارعان. قازىرگى ۋاقىتتا قازاقتىڭ ەتنيكالىق مادەنيەتىن ساقتاۋ جانە دامىتۋ كوممەرتسيالىق ەمەس ۇيىمدار وداعىنىڭ تەڭ ءتوراعاسى.

ر ف قىلمىستىق كودەكسىنىڭ 207.3-بابىنىڭ 1-بولىگى بويىنشا ەڭ از دەگەندە جەتى ءجۇز مىڭ رۋبل مولشەرىندە ايىپپۇل تولەۋ، ەڭ كوبى بەس جىلعا دەيىن باس بوستاندىعىنان ايىرۋ جازاسى قاراستىرىلعان.

اۆتور

ەركەجان سماعۇلوۆا