ماسكەۋ جاڭا داماسكپەن بايلانىس ورناتتى: اساد رەجيمى قۇلاعاننان كەيىنگى العاشقى ساپار

استانا. KAZINFORM - رەسەي دەلەگاتسياسى باشار اساد تاقتان تايدىرىلعاننان كەيىن سيريانىڭ جاڭا اكىمشىلىگىمەن العاشقى كەلىسسوزدەرىن وتكىزىپ، سەنىمدى قالپىنا كەلتىرۋ مەن ماسكەۋدىڭ ايماقتاعى اسكەري بازالارىنىڭ بولاشاعىن تالقىلادى.

Москва налаживает связи с новым Дамаском: первый визит после свержения Асада
Фото: SANA

رەسەي سىرتقى ىستەر ءمينيسترىنىڭ ورىنباسارى ميحايل بوگدانوۆ باستاعان رەسەي دەلەگاتسياسى سەيسەنبى كۇنى داماسكىگە باردى. بۇل - وتكەن جىلدىڭ جەلتوقسانىندا بۇرىنعى پرەزيدەنت باشار اساد تاقتان تايدىرىلعاننان كەيىنگى ماسكەۋدىڭ داماسكىگە جاساعان العاشقى رەسمي ساپارى.

ماسكەۋدەن بارعان دەلەگاتسيا داماسكىدە سيريانىڭ جاڭا اكىمشىلىگىنىڭ جەتەكشىسى احمەد اش-شاراامەن كەلىسسوزدەر جۇرگىزدى. دەلەگاتسيا قۇرامىندا رەسەي سىرتقى ىستەر ءمينيسترىنىڭ ورىنباسارى ميحايل بوگدانوۆ پەن رەسەي پرەزيدەنتىنىڭ سيريا بويىنشا ارنايى وكىلى الەكساندر لاۆرەنتيەۆ بولدى، دەپ حابارلايدى ريا نوۆوستي.

سەنىمدى قالپىنا كەلتىرۋ

كەزدەسۋ بارىسىندا سيريانىڭ ەگەمەندىگى مەن اۋماقتىق تۇتاستىعىن قۇرمەتتەۋ راستالدى، دەپ حابارلايدى سيريالىق SANA اقپارات اگەنتتىگى. رەسەي تاراپى سيريادا بولىپ جاتقان وڭ وزگەرىستەردى قولدايتىنىن مالىمدەگەن.

اگەنتتىكتىڭ حابارلاۋىنشا، رەسەي داماسكىنىڭ قالاۋىنا سايكەس «وتەماقى، قايتا قۇرۋ جانە قالپىنا كەلتىرۋ» ارقىلى سەنىمدى تىكتەي الادى.

- ديالوگ بارىسىندا وتەماقى، قايتا قۇرۋ جانە قالپىنا كەلتىرۋ سياقتى ناقتى شارالار ارقىلى سيريا حالقىمەن سەنىمدى قالپىنا كەلتىرۋدەگى رەسەيدىڭ ءرولى ەرەكشە اتاپ ءوتىلدى، - دەپ مالىمدەدى اگەنتتىك.

سيريانىڭ جاڭا اكىمشىلىگى ەلدىڭ ادىلەتتىلىككە، ابىروي مەن ەگەمەندىككە نەگىزدەلگەن بولاشاعىن قۇرۋ ءۇشىن بارلىق مۇددەلى تاراپتارمەن پرينتسيپتى قارىم-قاتىناسقا دەگەن تاباندىلىعىن راستادى.

داماسك بيلىگى قارىم-قاتىناستاردى قالپىنا كەلتىرۋ ءۇشىن بۇرىنعى قاتەلىكتەردى ەسكەرىپ، سيريا حالقىنىڭ ەركىن قۇرمەتتەپ، ولاردىڭ مۇددەلەرىنە قىزمەت ەتۋ كەرەكتىگىن باسا ايتتى.

رەسەيدىڭ سيرياداعى اسكەري بازالارى

كەزدەسۋدەن كەيىن رەسەيلىك تاراپ سيرياداعى اسكەري بازالارىن ساقتاۋ ماسەلەسى قوسىمشا كونسۋلتاتسيالاردى قاجەت ەتەتىنىن مالىمدەدى.

- ەشتەڭە وزگەرگەن جوق. بۇل ماسەلە قوسىمشا كەلىسسوزدەردى قاجەت ەتەدى. ءبىز ىنتىماقتاستىعىمىزدىڭ ءاربىر سالاسى بويىنشا تەرەڭىرەك كونسۋلتاتسيالاردى جالعاستىرۋعا كەلىستىك، - دەدى ر ف سىرتقى ىستەر ءمينيسترىنىڭ ورىنباسارى ميحايل بوگدانوۆ.

دەلەگاتسيانىڭ ءۇش ساعاتتان استام ۋاقىتقا سوزىلعان جاڭا اكىمشىلىكپەن «كونسترۋكتيۆتى» كەلىسسوزدەر جۇرگىزگەنىن اتاپ وتكەن بوگدانوۆ رەسەي تاراپىنىڭ «سيريا بىرلىگى، اۋماقتىق تۇتاستىعى مەن ەگەمەندىگىن قولدايتىنىن» راستاعانىن ايتتى.

ونىڭ ايتۋىنشا، رەسەيلىك تاراپ سيرياداعى ماسەلەلەردى «ينكليۋزيۆتى ساياسي ديالوگ» ارقىلى شەشۋ قاجەتتىگىن اتاپ وتكەن.

بوگدانوۆ سيريا سىرتقى ىستەر ءمينيسترى اساد ءال-شايباني رەسەيگە كەلسە، ماسكەۋ ونى قۋانا قارسى الاتىنىن ايتتى.

بۇگىندە ماسكەۋ سيرياداعى ەكى بازاسىن: تارتۋستاعى اسكەري-تەڭىز نىسانى مەن لاتاكيا پورتى ماڭىنداعى حمەيميم اۆيابازاسىن ساقتاپ قالۋعا ءۇمىتتى.

قاڭتار ايىندا سيريالىق Al Watan گازەتى سيريانىڭ ۋاقىتشا ۇكىمەتى تارتۋس پورتىن باسقارۋ جونىندەگى رەسەيلىك STG Stroytransgaz كومپانياسىمەن كەلىسىمشارتتى بۇزعانىن حابارلاعان.

كەلىسىمشارت كومپانيانىڭ ينفراقۇرىلىمعا ينۆەستيتسيالاردى قامتيتىن 2019 -جىلعى مامىلەنىڭ شارتتارىن ورىنداماۋىنا بايلانىستى توقتاتىلعان.

بۇل شەشىم بولەك كەلىسىم بويىنشا جۇمىس ىستەيتىن جانە رەسەيدىڭ جەرورتا تەڭىزىندەگى جالعىز اسكەري- تەڭىز بازاسى بولىپ تابىلاتىن تارتۋستاعى قولدانىستاعى رەسەي اسكەري-تەڭىز بازاسىنا اسەر ەتكەن جوق.

2024 -جىلى جەلتوقساندا سيريا پرەزيدەنتى باشار اساد بيلىكتەن تايدىرىلعاننان كەيىن رەسەي وعان باسپانا بەردى.

سيرياداعى رەسەيلىك كونتينگەنت لاتاكيا ماڭىنداعى حمەيميم اۋە بازاسىنا قايتا ورنالاستىرىلدى.

اۆتور

جاراسقان نۇرىبايەۆ

سوڭعى جاڭالىقتار