ماسكەۋ بيرجاسىنا سالىنعان سانكسيا قازاقستان قور بيرجاسىن بىرگە الا كەتپەي مە

استانا. KAZINFORM - قازاقستان قور بيرجاسى ( KASE) ا ق ش قارجى مينيسترلىگىنىڭ شەتەلدىك اكتيۆتەردى باقىلاۋ جونىندەگى باسقارماسى جاريالاعان اقپاراتقا تۇسىنىكتەمە بەردى.

«Office of Foreign Assets Control ا ق ش قارجى مينيسترلىگىنىڭ شەتەلدىك اكتيۆتەردى باقىلاۋ جونىندەگى باسقارماسى جاريالاعان «موسكوۆسكايا بيرجا» جاريا اكسيونەرلىك قوعامى مەن (ءارى قاراي - MOEX)، ۇلتتىق كليرينگ ورتالىعىنا، ۇلتتىق ەسەپتىك دەپوزيتارييگە ەنگىزىلگەن سانكسيالارعا قاتىستى قازاقستان قور بيرجاسى (KASE) مىنانى حابارلايدى.

2024 -جىلدىڭ 1-ماۋسىمىنداعى جاعداي بويىنشا KASE- دە ورنالاستىرىلعان اكسيالاردىڭ %13,1- ى MOEX- كە تيەسىلى.

OFAC شىعارعان №14024 اتقارۋ بۇيرىعىنا سايكەس، تۇلعانىڭ SDN تىزىمىندە بولۋى اكسيالارىنىڭ %50 نەمەسە ودان ارتىق ۇلەسىن SDN List - تەگى تۇلعا جەكە ءوزى نەمەسە وزگە دە سانكسياداعى تۇلعالارمەن بىرگە تىكەلەي نەمەسە جاناما باقىلايتىن بولسا، بۇعاتتاۋ سانكسيالارىن قولدانۋ تاۋەكەلىن تۋىنداتادى.

«KASE ونداي تۇلعالاردىڭ قاتارىنا جاتپايدى جانە شەكتەۋلەر قازاقستان قور بيرجاسىنا جانە KASE كليرينگ ورتالىعىنا ەشقانداي اسەر ەتپەيدى»، - دەلىنگەن KASE مالىمەتىندە.

قازاقستان قور بيرجاسىنىڭ ماسكەۋ بيرجاسىمەن اراسىنداعى بايلانىس قايتا قارالۋى مۇمكىن.

«وسىعان بايلانىستى قازاقستان قور بيرجاسى مەن KASE كليرينگ ورتالىعى شتاتتىق رەجيمدەگى جۇمىسىن جالعاستىرا بەرەدى. ساۋدا-ساتتىق، كليرينگ پەن ەسەپ ايىرىسۋلار ستاندارتتى رەگلامەنت بويىنشا جۇرگىزىلە بەرەدى. KASE سانكسيالىق شەكتەۋلەردى ەسكەرىپ، MOEX- پەن ىسكەرلىك قارىم-قاتىناستى جالعاستىرۋ ماسەلەسىن قاراستىرادى»، - دەپ جازىلعان رەسمي اقپاردا.

اۆتور

ەسىمجان ناقتىباي