ماروككو كورولى قۇربان ايتتا قوي سويۋدى توقتاتۋعا شاقىردى
استانا. KAZINFORM - ماروككو كورولى VI مۇحاممەد سارسەنبى كۇنى قۋاڭشىلىقتان كەيىن ەلدەگى مال باسىنىڭ ازايۋىنا بايلانىستى ماروككولىقتاردى بيىلعى قۇربان ايت مەرەكەسىنە وراي قوي شالۋ راسىمىنەن باس تارتۋعا شاقىردى، دەپ حابارلايدى CNN.
رەسمي دەرەكتەرگە سايكەس، ماروككودا 2025 -جىلعا قاراي ءىرى قارا مەن قوي سانى ۇزدىكسىز قۇرعاقشىلىق سالدارىنان توعىز جىل بۇرىنعى سوڭعى ساناقپەن سالىستىرعاندا 38 پايىزعا قىسقاردى.
- ءبىزدىڭ وسى ءدىني ءراسىمدى ەڭ جاقسى جاعدايدا ورىنداۋعا دەگەن ۇمتىلىسىمىز مال باسىنىڭ ايتارلىقتاي قىسقارۋىنا اكەلگەن ەلىمىزدىڭ الدىندا تۇرعان كليماتتىق جانە ەكونوميكالىق قيىندىقتاردى ەسكەرۋ جاۋاپكەرشىلىگىمەن بىرگە جۇرەدى، - دەلىنگەن كورولدىڭ حاتىندا. ونى Al Oula مەملەكەتتىك تەلەارناسىندا ءدىن ىستەرى جونىندەگى مينيستر احمەد تاوفيك وقىدى.
ماروككونىڭ جوعارعى ءدىني جەتەكشىسى كورول «وسىنداي قيىن جاعدايدا قۇرباندىق شالۋ حالقىمىزدىڭ ۇلكەن بولىگىنە، اسىرەسە تابىسى شەكتەۋلى ادامدارعا ايتارلىقتاي زيان تيگىزەتىنىن» اتاپ ءوتتى.
بيىل جاۋىن- شاشىن 30 جىلدىق ورتاشا دەڭگەيدەن %53- عا تومەن بولدى، سونىڭ سالدارىنان مالعا جايىلىم جەتىسپەدى. ەت ءوندىرىسى قىسقاردى، بۇل ىشكى نارىقتا باعالاردىڭ كوتەرىلۋىنە جانە ءىرى قارا، قوي جانە قىزىل ەت يمپورتىنىڭ ارتۋىنا اكەلدى.
- جاقىندا ەل اۋستراليادان 100 مىڭعا دەيىن قوي اكەلۋ تۋرالى كەلىسىمگە قول قويدى، - دەپ جازدى CNN.
ماروككو ءوزىنىڭ 2025 -جىلعى بيۋدجەتىندە ىشكى نارىقتاعى باعالاردى تۇراقتاندىرۋ ءۇشىن ءىرى قارا مال، قوي، تۇيە جانە قىزىل ەتكە يمپورتتىق باج سالىعىن جانە قوسىلعان قۇن سالىعىن توقتاتتى.
ەسكە سالا كەتسەك، قازاقستان مۇسىلماندارى ءدىني باسقارماسىنىڭ شاريعات جانە ءپاتۋا ءبولىمى 2025 -جىلعى ءدىني كۇندەر كەستەسىن بەكىتتى.
اۆتور
زارينا تۋعانبايەۆا
