مارقاكول اۋدانىندا توتەنشە جاعداي جاريالاندى

وسكەمەن. KAZINFORM - شىعىس قازاقستان وبلىسى مارقاكول اۋدانىنىڭ اۋماعىنداعى ورتا تەرەكتى سۋ قويماسىندا وبەكتىلىك سيپاتتاعى توتەنشە جاعداي جاريالاندى.

بۇل تۋرالى Kazinform اگەنتتىگىنىڭ تىلشىسىنە اۋدان اكىمىنىڭ ورىنباسارى نۇرسۇلتان بەيسەنوۆ ايتىپ بەردى.

- ورتا تەرەكتى سۋ قويماسى مارقاكول اۋىلدىق وكرۋگى اۋماعىندا ورنالاسقان. 2024 -جىلى سۋ قويماسىنا كوپ فاكتورلى زەرتتەۋ جۇرگىزىلدى. سول كەزدە شىعىس قازاقستان وبلىسى اكىمىنىڭ ورىنباسارى باقىتجان باياحمەتوۆ كەلگەن. سۋ قويماسىن قاراپ شىعىپ، جوندەۋ جۇمىستارىن جۇرگىزۋگە تاپسىرما بەرگەن، - دەيدى ول.

نۇرسۇلتان بەيسەنوۆتىڭ ايتۋىنشا، ورتا تەرەكتى سۋ قويماسىندا وبەكتىلىك سيپاتتاعى توتەنشە جاعداي جاريالاۋعا اۋدان اكىمى 8 -قاڭتار كۇنى قول قويعان. ءبىراق بۇل ءدال قازىر قانداي دا ءبىر قاۋىپ ءتونىپ تۇر دەگەن ءسوز ەمەس.

ال سۋ قويماسىنىڭ اپاتتىق جاعدايدا تۇرعاندىقتان جوندەۋدى قاجەت ەتەتىندىگى راس.

- توتەنشە جاعداي الدىن الا ويلاستىرىلىپ بارىپ جاريالاندى. سۋ قويماسىن كوكتەمگە دەيىن جوندەۋ قاجەت. ايتپەسە الداعى ۋاقىتتا ۇيلەر مەن تۇرعىندارعا قاۋىپ ءتونۋى مۇمكىن. ءبىزدىڭ ماقسات - سونىڭ الدىن الۋ. كۇردەلى جوندەۋ جۇمىستارىن باستاۋ ءۇشىن كونكۋرستىق راسىمدەردى وتكىزىپ، مەردىگەردى انىقتاۋىمىز كەرەك. ازىرگە ناقتى قانشا قاراجات جۇمسالاتىندىعى بەلگىسىز، - دەيدى اۋدان اكىمىنىڭ ورىنباسارى.

ەسكە سالساق، وسىعان دەيىن ا ق ش- تىڭ 5 شتاتىندا توتەنشە جاعداي جاريالانعانى حابارلانعان.

اۆتور

تالعاتجان مۇحامەتبەك ۇلى