مارات احمەتجانوۆ قوسشىداعى جەدەل جاردەم كولىگىنىڭ تاپشىلىعىن قالاي شەشەتىنىن ايتتى

بيىل اقمولا وبلىسىنىڭ اكىمى مارات احمەتجانوۆ ورتالىق كوممۋنيكاتسيالار قىزمەتىندە وتكەن بريفينگىدە قوسشى قالاسىنداعى جەدەل جاردەم كولىگىنىڭ تاپشىلىعىن قالاي شەشەتىنىن ايتتى، دەپ حابارلايدى Kazinform.

«رەسمي دەرەك بويىنشا، قوسشى قالاسىندا 52 مىڭ ادام تۇرادى. ال شىن مانىندە حالىق سانى 100 مىڭنان اسىپ كەتكەن. نورماتيۆ بويىنشا ءار 10 مىڭ ادامعا 1 سانيتاريالىق اۆتوكولىك بولۋ كەرەك. سوندا جەدەل جاردەم كولىگىنىڭ سانى قاجەتتىلىكتەن ەكى ەسە از دەگەن ءسوز. وسى پروبلەمالاردى شەشۋ ءۇشىن ءبىزدىڭ الدىمىزدا اگلومەراتسيا ورتالىعى مەن ىرگەلەس ەلدى مەكەندەردىڭ اراسىندا تەڭگەرىم ورناتۋ كەرەك. وسىعان بايلانىستى جاڭا كەشەندى جوسپار ازىرلەندى. ول جوسپاردىڭ اياسىندا 300 ءىس- شارا كوزدەلگەن. ونىڭ ىشىندە ينۆەستورلاردىڭ جەكە قاراجاتىنا ىسكە اسىرىلاتىندارى دا بار. استانا اكىمى ەكەۋىمىزدىڭ ارامىزدا استانا كاسىپكەرلەرىنە ءبىزدىڭ وڭىردە ەرەكشە جاعداي جاساۋ تۋرالى كەلىسىم بار. مىسالى، اقمولا وبلىسىنىڭ اۋماعىنا كىرەتىن استاناعا ىرگەلەس ەلدى مەكەندەردەن استانالىق ينۆەستورلارعا جەر تەلىمدەرىن بەرۋ كوزدەلىپ وتىر. وسىلايشا ءوڭىردىڭ اۋىل شارۋاشىلىعىنداعى الەۋەتى كەڭىنەن پايدالانىلادى. ول قاراپايىم حالىق ءۇشىن جۇمىس ورىندارى دەگەن ءسوز»، - دەدى اكىم.

ونىڭ سوزىنشە، ەلوردا اگلومەراتسياسىن دامىتۋ باعىتىندا وزەكتى پروبلەمالار بارشىلىق.

«كۇن سايىن ەلورداعا ىرگەلەس اۋىلداردان 200 مىڭ ادام، 30 مىڭ كولى كىرەدى. رەسمي مالىمەت بويىنشا، اگلومەراتسيا اۋماعىندا 300 مىڭ ادام تۇرىپ جاتىر. بۇل بيۋدجەتتى جوسپارلاۋ كەزىندە جانە الەۋمەتتىك نىساندار سالۋ ماسەلەسىندە بەلگىلى ءبىر قيىندىقتار تۋىنداتادى. سونىڭ دا اسەرىنەن ءبىزدىڭ ءوڭىر رەسپۋبليكا بيۋدجەتىنەن دوتاتسيا الاتىن وبلىستاردىڭ ءبىرى بولىپ كەلەدى»، - دەدى مارات احمەتجانوۆ.

اۆتور

ەسىمجان ناقتىباي