بۇعىنىڭ ءمۇيىزى مەن قانىنان ەرەكشە ەمدىك ءونىم الاتىن شارۋاشىلىق
استانا. KAZINFORM - بۋرابايدىڭ ساۋىقتىرۋ تۋريزمى جالپى جۇرتقا تانىمال بولا باستاعان. سولاردىڭ ءبىرى - اقمولا وبلىسى بۋراباي كەنتىنىڭ ىرگەسىندەگى بۇعىنىڭ ءمۇيىزى مەن قانىنان ەمدىك ماقساتتا ءونىم الىپ وتىرعان «AQ MARAL» شارۋاشىلىعى.
بۇگىندە اتالعان پرەزيدەنت ءىس باسقارماسى «بۋراباي» ۇلتتىق پاركىنىڭ مارال وسىرەتىن شارۋاشىلىعىندا 200-دەن استام باس تەڭبىل بۇعى قولدا باعىلۋدا. ولار وزدەرىنىڭ تابيعي ورتاسىندا - 600 گەكتارعا سوزىلىپ جاتقان قالىڭ ورمان القابىن مەكەندەيدى.
«قىس مەزگىلىندە كۇنىنە ەكى رەت جەم-ءشوبىن بەرەمىز. جازدى كۇنى مارالدار كوك شالعىندى قۋالاپ جايلىپ، قولعا كوپ كەلە بەرمەيدى. مەكەندەيتىن شارۋاشىلىق اۋماعى تەمىر تورلارمەن قورشالعان. وسى ۋاقىتقا دەيىن ءيت-قۇستان امانبىز. ءبىراق سوندا دا قاۋپسىزدىك ءۇشىن كۇزەتىپ، باقىلاپ وتىرامىز. تەڭبىل بۇعى 14-15 جىل ءومىر سۇرەدى. ونىڭ 3 جاسىنان باستاپ ءمۇيىزىن كەسىپ، ەمدىك ماقساتتا پايدالانامىز. نەگىزىنەن ماۋسىم-تامىز ايلارىندا كەسەمىز. ناۋرىزدىڭ اياعىندا بۇعىنىڭ ءمۇيىزى وزدىگىنەن تۇسە باستايدى دا، ورنىنا جاڭاسى ءوسىپ شىعادى. ولاردى ۇستاپ كورسەڭىز، جۇپ-جۇمساق بولادى. سول مۇيىزدەر 10-15 سانتيمەتردەي وسكەن كەزدە تۇبىنەن ەكى ەلى تۇعىرىن قالدىرىپ كەسەمىز. مارالدىڭ جاس مۇيىزىندە جان بولمايدى. دۇرىس ولشەپ، كەسسە اۋىرسىنۋدى سەزبەيدى»، - دەيدى ورتالىقتىڭ شارۋاشىلىق باسشىسى ايبولات راحماتۋلين.
مامانداردىڭ ايتۋىنشا، بۇعىنىڭ ءمۇيىزى مەن قانى - ارتريت، ارتروز، وستەوحوندروز سياقتى تىرەك-قيمىل جۇيەسى اۋرۋلارىن ەمدەۋ ءۇشىن، سونىمەن قاتار يممۋندىق جۇيەنى كۇشەيتۋگە قولدانىلادى. تابيعاتتا 22 ءتۇرلى امينقىشقىلى بار بولسا، ولاردىڭ 18- ءى بۇعى مۇيىزىنەن تابىلعان. جالپى الەمدە بۇعىنىڭ ءمۇيىزى مەن قانى ەمدىك ماقساتتا كەڭىنەن قولدانىلادى. سوندىقتان «AQ MARAL» شارۋاشىلىعى كەلگەن قوناقتارعا وسىنداعى پانتامەن ەمدەۋ ورتالىعىنا بارىپ، دارىگەردىڭ كەڭەسىن الا وتىرىپ، ەرەكشە ونىممەن ەم الۋىنا جاعداي جاساعان.
اۆتور
باقىتجول كاكەش
