ماراپات كەرەك بولسا، 25 مىڭ تولەڭىز: دارىندى وقۋشىلار وليمپياداسىنان شۋ شىقتى

оқушы
Фото: Pexels

استانا. KAZINFORM - الەۋمەتتىك جەلىلەردە «دارىندى 1000 بالا» رەسپۋبليكالىق دارىندى وقۋشىلار بايقاۋىنا قاتىستى شۋ شىقتى. ۇيىمداستىرۋشىلار بايقاۋدىڭ ەكىنشى كەزەڭىنە جولداما العان بالالاردان 25 مىڭ تەڭگە جارنا تالاپ ەتكەن.

قاراجات اۋدارعاندارعا «قازاقستان دارىنى» اتتى توسبەلگىشە، توسەبەلگىشەنى كۋالاندىراتىن كۋالىك، رەسپۋبليكالىق I ،II ،III دارەجەلى ديپلوم، وقۋشىنىڭ جەتەكشىسىنە جانە اتا-اناسىنا قولداۋ كورسەتكەنى ءۇشىن العىس حات بەرىلەدى دەپ جازىلعان.

بۇعان استانا قالاسىندا وتەتىن ماراپاتتاۋ كەشىنە ەلىمىزدىڭ شالعاي اۋىلدارىنان كەلەتىن بالالاردىڭ جول اقىسىن قوسىڭىز.

تۇپتەپ كەلگەندە، اقشاسى بارلار توسبەلگى تاعادى، قاراجاتى جوقتار ماراپاتتان قاعىلادى دەگەن ءسوز.

олимпиада
Фото: әлеуметтік желіден

وسىعان وراي وقۋ-اعارتۋ مينيسترلىگىنىڭ باسپا ءسوز قىزمەتى اگەنتتىك تىلشىسىنە رەسمي جاۋاپ بەردى.

وعان سەنسەك، بۇگىندە ەلىمىزدە رەسمي تۇردە اۋىل وقۋشىلارىنا ارنالعان مىناداي وليمپيادالار بار:

اۋىل مەكتەپتەرىنىڭ 9-11 (12) - سىنىپ وقۋشىلارىنا ارنالعان جالپى ءبىلىم بەرەتىن پاندەر بويىنشا رەسپۋبليكالىق وليمپيادا

اۋىل مەكتەپتەرىنە ارنالعان «مىڭ بالا» ۇلتتىق زياتكەرلىك وليمپياداسى

IQanat وليمپياداسى.

- بۇل وليمپيادالار تەگىن. اتالعان اۋىل وقۋشىلارى اراسىنداعى «دارىندى 1000 بالا» وليمپياداسى № 514 بۇيرىققا ەنبەگەن جانە رەسمي ءىس-شارا ەمەس ەكەنىن حابارلايمىز. وبلىستىق ءبىلىم باسقارمالارىنا مۇعالىمدەر مەن اتا-انالارعا ءتۇسىندىرۋ جۇمىسىن جۇرگىزۋ تاپسىرىلدى. سونداي-اق، «دارىن» ر ع پ و وسى كومپانيانىڭ الداعى قىزمەتى تۋرالى قۇقىق قورعاۋ ورگاندارىنا حابارلاسىپ، ءتيىستى شارا قابىلدايتىن بولادى، - دەلىنگەن رەسمي اقپاراتتا.

سوڭعى كەزدە ءبىلىم سالاسىندا وسىنداي اقىلى بايقاۋلار قاپتاپ كەتكەنى جاسىرىن ەمەس. اقشا اۋدارعانداردىڭ ءبارى جۇلدەسىز قالماي، ەلەكتروندى العىس حات جولدانادى.

اۆتور

ورالحان قوجانوۆ

سوڭعى جاڭالىقتار