مامىردا جاڭا يپوتەكالىق تۇرعىن ءۇي باعدارلاماسى ىسكە قوسىلادى - مينيستر

استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ جاڭا باسپانا باعدارلاماسى تۋرالى ءمالىم ەتتى.

«مامىردا «وتباسى بانكىمەن» جاڭا يپوتەكالىق باعدارلاما ىسكە قوسىلادى. يپوتەكالىق نەسيە الەۋمەتتىك وسال توپتارعا 7 پايىزبەن، قالعان ساناتتاعى ازاماتتار ءۇشىن 9 پايىزبەن بەرىلەدى. العاشقى جارنا 20 پايىزدى قۇرايدى»، - دەدى قانات شارلاپايەۆ ۇكىمەت وتىرىسىندا.

تۇرعىن ءۇي باعدارلاماسى مونوقالالارمەن قاتار اۋىلدا دا قولدانىسقا ەنگىزىلەدى.

«جالپى بولىنەتىن قاراجاتتىڭ %30- دان اسپايتىن مولشەردە مونوقالالار مەن ەلدى مەكەندەردە تۇرعىن ءۇيدى ەكىنشى نارىقتان ساتىپ الۋعا بولادى. بيىل 300 ميلليارد تەڭگەگە 12 مىڭ يپوتەكالىق نەسيە بەرىلسە، ودان ءارى 8 مىڭ نەسيە بەرۋ ءۇشىن جىل سايىن 200 ميلليارد تەڭگە قاراستىرىلادى»، - دەيدى ۆەدومستۆو باسشىسى.

سونداي-اق، مينيستر مەملەكەت باسشىسىنىڭ ۇلتتىق قۇرىلتايدا بەرگەن تاپسىرماسىنا سايكەس ساتىپ الۋ قۇقىعىمەن بەرىلەتىن ارەندالىق تۇرعىن ءۇي تۋرالى ايتتى.

«ونىڭ كولەمىن بىرنەشە ەسەگە ارتتىرىپ، جاڭا يپوتەكالىق باعدارلامانى ىسكە قوسۋى قاجەت. مەحانيزمدەردىڭ نەگىزگى شارتتارىنا توقتالاتىن بولسام. اكىمدىكتەر جەكە قۇرىلىس كومپانيالارىنان اۋدانى 80 شارشى مەتردى قۇرايتىن جاڭا تۇرعىن ءۇيدى ساتىپ الادى. ءتيىستى نورمالاردى ۇكىمەت قابىلدادى، مامىر باستاپ قارجىلاندىرۋ باستالادى»، - دەيدى ول.

ايتا كەتسەك، ماجىلىستە كەزەكتە تۇرعاندارعا ارەندالىق تۇرعىن ءۇيدى جەكەشەلەندىرۋ قۇقىعىن بەرەتىن زاڭ جوباسى قارالىپ جاتىر.

اۆتور

داۋلەت ىزتىلەۋ