ماۋلەن اشىمبايەۆ قازاقستاندىقتاردى ناۋرىز مەيرامىمەن قۇتتىقتادى

Nauryz
Photo: Facebook

استانا. KAZINFORM – ق ر پارلامەنتى سەناتىنىڭ ءتوراعاسى ماۋلەن اشىمبايەۆ قازاقستاندىقتاردى ناۋرىز مەيرامىمەن قۇتتىقتادى.

«قۇرمەتتى دوستار!

بارشاڭىزدى ۇلىستىڭ ۇلى كۇنى - ناۋرىز مەيرامىمەن شىن جۇرەكتەن قۇتتىقتايمىن!

ناۋرىز - ىزگىلىك، تازالىق، جاناشىرلىق سياقتى ماڭىزدى قۇندىلىقتاردى دارىپتەيتىن كوكتەم مەرەكەسى. جاڭارۋ مەن جاڭعىرۋدىڭ باستاۋى بولعان بۇل مەيرام - ءبىزدىڭ ءتول جاڭا جىلىمىز. سوندىقتان حالقىمىز ەجەلدەن وسى كۇنگە ەرەكشە ءمان بەرىپ، ءاز- ناۋرىزدى جاقسىلىقتىڭ، جاراسىمدىلىقتىڭ جانە جاسامپازدىقتىڭ جارشىسى رەتىندە دارىپتەپ كەلەدى.

پرەزيدەنتىمىز قاسىم-جومارت كەمەل ۇلى توقايەۆتىڭ باستاماسىمەن بيىل ەلىمىزدە ناۋرىز مەيرامى جاڭاشا اتالىپ ءوتىپ جاتىر. ارنايى ناۋرىزناما ونكۇندىگى جاريالانىپ، كورىسۋ، قايىرىمدىلىق، مادەنيەت جانە سالت-ءداستۇر، شاڭىراق، ۇلتتىق كيىم، جاڭارۋ، ۇلتتىق سپورت، ىنتىماق، جىل باسى جانە تازارۋ سياقتى قوعامدى ۇيىستىرار قۇندىلىقتارعا باسا ءمان بەرىلۋدە.

مۇنداي قادام ۇلتتىق بىرەگەيلىكتى نىعايتۋ جانە مەرەكەنىڭ ماڭىزى مەن مازمۇنىن ارتتىرۋ جولىندا ايرىقشا مانگە يە. الداعى ۋاقىتتا بۇل باستاما يگى داستۇرگە اينالىپ، حالقىمىزدىڭ تاربيە مەن تاعىلىمعا تابان تىرەگەن وزىق ويلى ۇلت بولىپ قالىپتاسۋىنا ءوز سەپتىگىن تيگىزەدى دەپ سەنەمىن.

بارشاڭىزدى مەرەكەمەن قۇتتىقتاي وتىرىپ، ەلىمىزگە اماندىق پەن تىنىشتىق، ءار شاڭىراققا شاتتىق پەن باق- بەرەكە تىلەيمىن!

ۇلىس وڭ بولسىن!»، - دەپ جازدى سەنات ءتوراعاسى ءوزىنىڭ Facebook پاراقشاسىندا.

سوڭعى جاڭالىقتار