ماۋلەن اشىمبايەۆ ۇلتتىق مۋزەيدەن الىنىپ تاستالعان نۇرسۇلتان نازاربايەۆ مۇسىنىنە قاتىستى پىكىر ءبىلدىردى
استانا. KAZINFORM - سەنات ءتوراعاسى ماۋلەن اشىمبايەۆ ۇلتتىق مۋزەي اتريۋمىنان نۇرسۇلتان نازاربايەۆ ءمۇسىنىنىڭ الىنۋىنا قاتىستى پىكىر ءبىلدىردى.
سەنات ءتوراعاسى ۇلتتىق مۋزەيدەن (نۇرسۇلتان نازاربايەۆتىڭ) ەسكەرتكىشى الىنعانىن ەستىمەگەنىن ايتتى.
«سىزدەردەن ەستىپ جاتىرمىن. ءبىز پلەنارلىق وتىرىستا بولدىق. جاڭالىقتاردى ءالى كورمەدىك. ەندى ونداي شەشىم قابىلدانسا، ۇلتتىق مۋزەيدىڭ باسشىلىعىنىڭ شەشىمى شىعار دەپ ويلايمىن. سوندىقتان مۇندا ۇلتتىق مۋزەيدىڭ باسشىلىعىنىڭ ۇستانىمدارىنا سايكەس، ونداعى ەكسپوزيتسيالاردى جاڭارتۋعا بايلانىستى وسىنداي شەشىم قابىلداعان شىعار. سوندىقتان بۇل ماسەلەگە بايلانىستى سۇراعىڭىزدى ۇلتتىق مۋزەيگە جولداساڭىز دۇرىس بولادى»، - دەدى م. اشىمبايەۆ.
بۇدان بۇرىن حابارلانعانداي، ۇلتتىق مۋزەي اتريۋمىنان نۇرسۇلتان نازاربايەۆتىڭ ءمۇسىنى الىنىپ تاستالدى.
«ەسكەرتكىشكە كەلەتىن بولساق، بۇل ەكسپونات مۋزەي مۇلكى بولىپ سانالادى جانە اتريۋم تۇجىرىمداماسىنىڭ وزگەرۋىنە بايلانىستى مۋزەي قورىندا تۇراقتى ساقتاۋدا بولادى. مۋزەيدىڭ دامۋىنا قىزىعۋشىلىق تانىتىپ، ونىڭ ءىس- شارالارى، اكتسيالارى مەن كورمەلەرىنە نازار اۋداراتىن قازاقستاندىقتاردىڭ، بلوگەرلەر مەن جۋرناليستەردىڭ ۇستانىمى مۋزەي قىزمەتكەرلەرىن قۋانتادى. مۋزەي كەڭىستىگىندە بولاتىن الداعى وزگەرىستەر مەن جاڭارتۋلاردى جانە كورمە زالدارىنىڭ كوركەمدىك- ستيلدىك شەشىمدەرىن قالىڭ جۇرتشىلىق جوعارى باعالايدى دەپ سەنەمىز»، - دەيدى ۇلتتىق مۋزەي وكىلدەرى.
اۆتور
رۋسلان عابباسوۆ
