مال ساۋداسىنداعى دەلدالداردى بيرجا ارقىلى جويامىز - قاسىم- جومارت توقايەۆ
استانا. KAZINFORM - مەملەكەت باسشىسى قاسىم-جومارت توقايەۆ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مال ساۋداسىنىڭ بيرجاسى نە ءۇشىن قۇرىلىپ جاتقانىن ايتتى.
«بىلتىرعى جولداۋدا ءۇش جىلدىڭ ىشىندە اگروونەركاسىپ كەشەنىندەگى قايتا وڭدەلگەن ءونىمنىڭ ۇلەسىن 70 پايىزعا دەيىن ارتتىرۋ مىندەتىن قويدىم. ءبىز نەگىزگى ازىق-تۇلىك تاۋارلارى بويىنشا يمپورتقا تاۋەلدىلىكتى ازايتۋعا باعىتتالعان ءبىرقاتار جوبانى جۇزەگە اسىرا باستادىق. اتاپ ايتقاندا، تاياۋ جىلدارى ءسۇت ءوندىرۋ كولەمىن 600 مىڭ تونناعا كوبەيتۋگە مۇمكىندىك بەرەتىن 116 زاماناۋي تاۋارلى ءسۇت فەرماسى سالىنادى»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، الداعى ۋاقىتتا جىلىنا 220 مىڭ توننا قۇس ەتىن وندىرەتىن 29 فابريكانى، جىلىنا 850 ميلليون جۇمىرتقا وندىرەتىن 11 قۇس فابريكاسىن پايدالانۋعا بەرۋ كوزدەلگەن.
«100 مىڭعا جۋىق ءىرى قاراعا ارنالعان 6 بورداقىلاۋ الاڭىن، سونداي-اق 50 مىڭ باس ۋاق مالعا ارنالعان بورداقىلاۋ كەشەنىن ىسكە قوسۋ جوسپارلانىپ وتىر. سونىمەن قاتار ۇكىمەت العاشقى مامانداندىرىلعان بيرجا اشۋدى قولعا الدى. بۇل كەشەندە مال ساۋداسىنىڭ زاماناۋي ەرەجەلەرى ساقتالىپ، فەرمەرلەر مەن تۇتىنۋشىلار اراسىندا باسى ارتىق دەلدالدار بولمايدى»، - دەدى پرەزيدەنت.
بيىل ەلىمىزدە 4,5 مىڭنان استام تراكتور مەن استىق جينايتىن 815 كومباين شىعارىلدى.
«مەن اۋىل شارۋاشىلىعى تەحنيكاسىن جاڭارتۋ دەڭگەيىن جىلىنا 8-10 پايىزعا دەيىن جەتكىزۋ جونىندە مىندەت قويدىم. بۇل ماقساتقا 120 ميلليارد تەڭگە ءبولىنىپ، وتاندىق اۋىل شارۋاشىلىعى تەحنيكالارىن جىلىنا 5 پايىزبەن جەڭىلدەتىلگەن ليزينگكە بەرۋ باعدارلاماسى باستالدى»، - دەدى قاسىم-جومارت توقايەۆ.
پرەزيدەنت قازاقستاندا 8 ءىرى بىرلەسكەن كاسىپورىن، ونىڭ ىشىندە «كلااس» نەمىس كونسەرنى مەن رەسەيلىك «روستسەلماش» كومپانياسى تابىستى جۇمىس جاساپ جاتقانىن ايتتى.
«بيىل شامامەن 160 ميلليارد تەڭگەگە جۋىق قارجىعا 4,5 مىڭنان استام تراكتور مەن استىق جينايتىن 815 كومباين شىعارىلدى. ۇكىمەت ەڭبەك ونىمدىلىگىن ارتتىرۋعا، يمپورتتالاتىن قوسالقى بولشەكتەردى لوكاليزاتسيالاپ، ۇساق بولشەكتەردەن قۇراستىرىلاتىن ءوندىرىستى قولداۋعا جانە تۇراقتى جۇمىس ورىندارىن اشۋعا باسا ءمان بەرۋى كەرەك»، - دەدى مەملەكەت باسشىسى.
ەسكە سالا كەتەيىك، استانادا اۋىل شارۋاشىلىعى سالاسى قىزمەتكەرلەرىنىڭ فورۋمى ءوتىپ جاتىر.
اۆتور
مارلان جيەمباي
