مادەنيەت مينيسترلىگى جانىنان ادەبي كلۋب قۇرىلادى - كىتاپ دۇكەندەرى قازاق ءتىلدى تۋىندىلارمەن تولىعۋى كەرەك
استانا. KAZINFORM - ق ر مادەنيەت جانە اقپارات ءمينيسترى ايدا بالايەۆا كىتاپ دۇكەندەرى قازاق ءتىلدى تۋىندىلارمەن تولىعۋى كەرەگىن، ول ءۇشىن اقىن-جازۋشىلارعا قولداۋ كورسەتىلەتىنىن ءمالىم ەتتى.
«وتاندىق ادەبيەتتى قولداۋ بويىنشا مەن مينيستر بلوگى مەن الەۋمەتتىك جەلىلەردە ۇنەمى ايتىپ ءجۇرمىن. سونىڭ ءبىرى - كىتاپ باسۋ ءىسى. ءسوز جوق، كىتاپ دۇكەندەرى قازاق ءتىلدى تۋىندىلارمەن تولىعۋعا ءتيىس. ەندى كىتاپتاردى باسىپ شىعارۋ، ادەبيەتتى قولداۋ قالىڭ كوپشىلىكپەن تالقىلانىپ، جاڭا ەرەجەگە سايكەس جۇزەگە اسادى»، - دەدى مينيستر قازمەديا ورتالىعىندا مينيسترلىكتىڭ القا وتىرىسىندا.
بۇل رەتتە مادەنيەت ءمينيسترى ۇلت ينتەللەگەنتسياسىنا جۇكتەلەر مىندەتتىڭ سالماعى اۋىر ەكەنىن اتاپ ءوتتى. زيالى قاۋىم ءبىلىم-عىلىمعا قۇشتارلىق، ەڭبەك ادامىن قادىرلەۋ، ادال ازاماتتاردى ارداق تۇتۋ سياقتى ادامدىق ىزگى قاسيەتتەردى قالىڭ وقىرمان ساناسىنا سىڭىرەدى دەگەن ءۇمىت ءبىلدىردى.
«وسىعان وراي، مينيسترلىك جانىنان ادەبي كلۋب قۇرۋدى جوسپارلاپ وتىرمىز. ونداعى ماقسات - ادەبيەتتىڭ وزەكتى ماسەلەلەرىن ورتاعا سالىپ، جاڭا تەندەنسيالاردى تالقىلاۋ جانە جاڭا تۋىندىلار مەن اۆتورلاردى ناسيحاتتاۋ، قوعامدى كىتاپ وقۋعا ۇندەۋ»، - دەدى سپيكەر.
مينيسترلىكتىڭ حابارلاۋىنشا، 2023-جىل جالپى تارالىمى 346 مىڭ دانا بولاتىن 134 كىتاپ جارىق كوردى. سونىڭ ىشىندە «جاڭا قازاق ادەبيەتى» سەرياسىمەن بۇرىن جاريالانباعان 14 تۋىندى 42 مىڭ دانامەن وقىرمانعا جول تارتتى. سونداي-اق بالالار مەن جاسوسپىرىمدەرگە ارنالعان 16 ادەبيەت 48 مىڭ دانامەن باسىلىپ، تاراتىلعان.
«قانداي ونەر بولسا دا، ونىڭ ءتۇپ نەگىزى - ادەبيەت. ادەبيەت دامىماي، ونەردىڭ باسقا سالاسىنىڭ تولىققاندى دامۋى مۇمكىن ەمەس. ارينە، مەملەكەت وتاندىق اقىن-جازۋشىلارىمىزدى قولداۋ ماسەلەسىن ءبىر ساتكە دە ۇمىتقان ەمەس. وتكەن جىلدارى بۇل باعىتتا جاسالعان جۇمىس از ەمەس. سوڭعى 3 جىلدا مەملەكەتتىڭ تىكەلەي قولداۋىمەن جاڭا تۋىندىلاردى، اسىرەسە، جاس تالانتتاردى قولداۋ، ۇلتتىق ادەبيەتىمىزدىڭ جاۋھارىنا اينالعان شىعارمالاردى قايتا باسىپ شىعارۋ، ولاردى الەم تىلدەرىنە اۋدارۋ ءىسى، قالامگەرلەرىمىزدىڭ تۆورچەستۆولىق كەشتەرى مەن مەرەيتويلارى سەكىلدى يگى شارالار اتقارىلدى»، - دەدى ايدا بالايەۆا.
اۆتور
ايجان سەرىكجان قىزى
