ماڭعىستاۋدا تۇڭعىش رەت اسكەري كاتەر قۇراستىرىلىپ، پايدالانۋعا بەرىلدى
استانا. KAZINFORM - رەسپۋبليكا كۇنى قارساڭىندا ماڭعىستاۋ وبلىسىندا قۇراستىرىلعان «شاپشاڭ» اسكەري دەسانتتىق كاتەرى كاسپي تەڭىزىنە ءتۇسىرىلدى. بۇل تۋرالى ماڭعىستاۋ وبلىسى اكىمىنىڭ باسپا ءسوز قىزمەتى حابارالادى.
سالتاناتتى ءىس-شاراعا ماڭعىستاۋ وبلىسىنىڭ اكىمى نۇرداۋلەت قيلىباي، قورعانىس ءمينيسترىنىڭ ورىنباسارى گەنەرال- لەيتەنانت سۇلتان قامالەتدينوۆ، قارۋلى كۇشتەردىڭ كونتر- ادميرالى راتمير كامراتوۆ جانە اسكەري قىزمەتشىلەر مەن قالا تۇرعىندارى قاتىستى.
سۋ جاڭا كاتەر تەڭىزدەگى مەملەكەت شەكاراسىن، ەلدىڭ ءبىرتۇتاستىعىن قورعاۋعا قىزمەت ەتەدى.
العاشقى بولىپ سويلەگەن قورعانىس ءمينيسترىنىڭ ورىنباسارى جاۋىنگەرلەر كاتەرىن تەڭىزگە جىبەرۋ قازاق جۇرتى ءۇشىن قۋانىشتى ءسات ەكەنىن ايتتى. ونىڭ سوزىنشە، ماڭعىستاۋدا جاسالعان كاتەر ءوڭىردىڭ تەڭىز الەۋەتىنىڭ قارقىندى دامىپ جاتقانىن اڭعارتادى.
- پرەزيدەنت جولداۋىندا ايتقانداي، جاھاندىق اسكەري تەحنيكا ءوندىرىسى دامىعان مەملەكەتتەردىڭ ۇلتتىق قورعانىس جۇيەسىندە شەشۋشى ءرول وينايدى. قازىرگى زامان - جاڭا تەحنولوگيا زامانى. بۇل كاتەر - وتانىمىزدىڭ ينجەنەريا سالاسىنىڭ جوعارى دەڭگەيىنىڭ ايقىن دالەلى»، - دەدى سۇلتان قامالەتدينوۆ.
ءوڭىر باسشىسى نۇرداۋلەت قيلىباي ۇلتتىق مەرەكە - رەسپۋبليكا كۇنى قارساڭىندا بولىپ جاتقان تاريحي وقيعانىڭ عالىمداردىڭ توككەن تەرى مەن ەڭبەگىنىڭ ناتيجەسى ەكەنىن ايتتى.
- مەملەكەت باسشىسى قاسىم- جومارت توقايەۆ قازاق قۇرىلىس يندۋسترياسىن دامىتۋ، تەرەڭدەتۋ قاجەت دەپ باعىت- باعدار بەرگەن ەدى. مىنە، ناتيجەسىن، جەمىسىن كورىپ وتىرمىز. وڭىرىمىزدە جاسالعان وتاندىق ءونىم ەل تىنىشتىعىن كۇزەتىپ، تەڭىز اسكەرلەرىنىڭ ناتيجەلى قىزمەت ەتۋىنە كومەكتەسەدى. وسى جوبانى جۇزەگە اسىرعان ازاماتتارعا، ماماندارعا، قۇرىلىسشىلارعا كوپ راحمەت ايتامىن. ازاماتتار وزدەرىنىڭ شەبەرلىكتەرىن دالەلدەدى، - دەپ اكىم ريزاشىلىعىن ءبىلدىردى.
جاڭا كاتەردى قۇراستىرعان «كەمە جابدىقتارى جانە سەرۆيس» ج ش س- ءنىڭ ديرەكتورى دميتري دونسكويدىڭ ايتۋىنشا، تەك قورعانىس سالاسىندا ەمەس، ازاماتتارعا ارنالعان، تۋريزم، ترانسپورت باعىتىندا، توتەنشە جاعدايلار كەزىندە قولدانىلاتىن تەحنيكالاردى دا جاساۋعا مۇمكىندىكتەرى بار.
اۆتور
ابىلايحان جۇماشيەۆ
