ماڭعىستاۋدا تابيعات ينسپەكتورلارى ەرەكشە قۇستى فوتوعا ءتۇسىردى

اقتاۋ. KAZINFORM - «قىزىلساي» مەملەكەتتىك وڭىرلىك تابيعي پاركى ينسپەكتورلارى «تاسورپا» مەملەكەتتىك تابيعي قاۋمالىنان ەرەكشە قۇستى سۋرەتكە ءتۇسىرىپ الدى.

تابيعات ينسپەكتورلارى قاۋمال اۋماعىن قاراۋ كەزىندە فوتوقۇرىلعىعا اق ءتۇستى جاپالاقتى تۇسىرگەنىن مالىمدەپ وتىر. مۇنداي قۇس وڭىردە سيرەك كەزدەسەدى. ال پارك باسشىسى مىڭبەرگەن قاراتاۋوۆ اق جاپالاقتى ەكى اپتا بۇرىن بايقاعانىن اتادى.

«بۇل قۇستىڭ دەنەسىن اق تۇك باسقان. جۇمىرقادان شىققاندا سوقىر بولىپ تۋادى. اتالعان جاپالاق تارىزدىلەر جاندىكتەرمەن، كەمىرۋشىلەرمەن قورەكتەنەدى. ءبىز 4-ناۋرىز كۇنى «قىزىلساي» پاركىنە قاراستى «تاسورپا» مەملەكەتتىك تابيعي قاۋمالىنان بايقاپ، سۋرەتكە تۇسىردىك»، - دەدى «قىزىلساي» مەملەكەتتىك وڭىرلىك تابيعي پاركىنىڭ ديرەكتورى مىڭبەرگەن قاراتاۋوۆ.

ەرەكشە جاپالاقتىڭ باسى ۇلكەن، كوزدەرى بادىرايعان، كوز بۇرشاعى قيمىلسىز، بەتى تەگەرىشتى، قاۋىرسىندارى وتە جۇمساق، ۇشقاندا دىبىسسىز قانات قاعادى. كەمىرۋشىلەرمەن قورەكتەنىپ، جەمىن تۇندە اۋلايدى. ۇياسىن كوبىنە اعاشتىڭ قۋىسىنا، كەيدە جەرگە سالادى.

«ۇياداعى جۇمىرتقالاردىڭ سانى دەنە مولشەرىنە بايلانىستى 2-دەن 12-گە دەيىن جەتەدى. ال جۇمىرتقالاردى انالىعى باسادى. 28 تۋىسقا بىرىگەتىن 133 ءتۇرىنىڭ قازاقستاندا 9 تۋىسى، 12 ءتۇرى كەزدەسەدى. ولاردىڭ 10-ى ۇيا سالادى. مامىر- ماۋسىم ايلارىندا ىرىلەرى 1-2-دەن، ال مايدا قۇستارى 10-12-دەن جۇمىرتقا سالىپ، ونى مەكيەنى 4 اپتاداي باسادى. بالاپاندارى 30 كۇندە قاناتتانادى»، - دەدى مىڭبەرگەن قاراتاۋوۆ.

بۇعان دەيىن ماڭعىستاۋدا « قىزىلساي» مەملەكەتتىك وڭىرلىك تابيعي پاركىنىڭ قورعاۋىنداعى ارقار، قاراقۇيرىق باسى كوبەيگەنى حابارلانعان بولاتىن.

سونداي- اق ەرەكشە قورعالاتىن تابيعي اۋماقتا زاڭسىز اڭ اۋلاعان بەينەۋ اۋدانىنىڭ ەكى تۇرعىنىن ينسپەكتورلار انىقتادى.

اۆتور

جانكەلدى قارجان