ماڭعىستاۋدا ءبىر كۇندە 8 ادامنان قاتەرلى ىسىك انىقتالدى
اقتاۋ. KAZINFORM - ماڭعىستاۋدا قاتەرلى ىسىككە شالدىققاندار جىلدان-جىلعا كوبەيىپ بارادى. ماسەلەن، 2020-جىلى 712، 2021-جىلى 855، 2022-جىلى 1000، 2023-جىلى 1043 ادام ال، بيىل سەگىز ايدىڭ ىشىندە 669 تۇرعىننان ونكولوگيالىق اۋرۋ انىقتالعان.
بيىل تىركەلگەن ناۋقاستاردىڭ كوبىنىڭ اۋرۋى العاشقى ساتىدا. تەك 81 ادامنىڭ قاتەرلى ىسىگى سوڭعى ساتىدا انىقتالىپ وتىر. ماماندار قاتەرلى ىسىكتى ەرتە انىقتاۋدا دارىگەرگە ءجيى قارالۋدىڭ كومەگى كوپ ەكەنىن ايتادى.
وسىعان وراي، ماڭعىستاۋ وبلىستىق ونكولوگيالىق ديسپانسەرى ءوڭىر تۇرعىندارىنا ارناپ «اشىق ەسىك» كۇنىن وتكىزدى. تاڭعى ساعات توعىزدان تۇسكى بىرگە دەيىن 44 تۇرعىن تەكسەرىلگەن.
- ءوز دەنساۋلىعىنا بەيجاي قاراماي، تەكسەرىلۋگە كەلگەندەردىڭ ىشىنەن 8 ادامنان قاتەرلى ىسىك انىقتالدى. تاعى 3 تۇرعىننىڭ دەنساۋلىعى وسى دەرتكە كۇدىكتى دەپ تىركەلدى. ال 28 ادامنان باسقا اۋرۋ تۇرلەرى انىقتالىپ، ولارعا دارىگەرلەر ەمدەلۋ جولدارىن ءتۇسىندىردى، - دەيدى وبلىستىق ونكولوگيالىق ديسپانسەردىڭ باسپا ءسوز حاتشىسى ساعىندىق رزاحمەتوۆ.
اشىق ەسىك كۇنىندە 24 ادام ونكوسيتولوگيالىق تەكسەرىلۋگە جىبەرىلىپ، 16 تۇرعىن ۋزي، 21 ادام تومەن دوزالى ك ت جانە 17 ادام مامموگرافيا اپپاراتىنا ءتۇسىپ، تەكسەرىلگەن. ديسپانسەردە اشىق ەسىك كۇنى اي سايىن وتكىزىلەدى.
بۇعان دەيىن ايماقتا قوقىس پوليگونىنىڭ ورتەنىپ جاتقانىن جازعان ەدىك.
اۆتور
اياگوز ءىزباساروۆا
