ماڭعىستاۋ ءوڭىرىنىڭ اۋداندارىنا عارىشتان مونيتورينگ جاسالادى

ماڭعىستاۋ وبلىسىندا زاڭسىز قوقىس شىعارۋ ماسەلەسى وزەكتى كۇيىندە قالىپ وتىر. بىرنەشە جىل بۇرىن اقتاۋ جانە جاڭاوزەن قالالارىندا، سونداي- اق ولاردان 50 شاقىرىم راديۋستا زاڭسىز قوقىس ورىندارىن انىقتاۋ ءۇشىن عارىشتان ءتۇسىرىلىم جاساۋ ىسكە قوسىلدى.

2024 -جىلدان باستاپ مۇنداي تۇسىرىلىمدەر اۋدان ورتالىقتارىندا دا جۇرگىزىلەتىن بولادى. قازاقپارات بۇل تۋرالى ءوڭىر اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى.

عارىشتان جۇرگىزىلگەن مونيتورينگ ناتيجەسىندە بيىلعى مامىر ايىنىڭ باسىنان ءوڭىر اۋماعىندا 111 پوليگون تابىلدى، ونىڭ 9 اقتاۋدا، 66 جاڭاوزەندە، 30 مۇنايلى اۋدانىندا، 6 ءتۇپقاراعان اۋدانىندا. قازىرگى ۋاقىتتا بەيبەرەكەت قوقىس الاڭدارىنىڭ 84- ءى جويىلدى، بۇل جوسپارلانعان جۇمىستاردىڭ %76 قۇرايدى.

«اعىمداعى جىلدىڭ قازان ايىندا جاڭاوزەندە رۇقسات ەتىلمەگەن قوقىس ۇيىندىلەرىن تازارتۋ ءۇشىن مەردىگەرىمەن 170 ميلليون تەڭگە سوماسىنا كەلىسىمشارت جاسالدى. ولار 35 گەكتار اۋماقتا 13380 توننا قوقىستى وڭدەۋى قاجەت. سونداي-اق جەلتوقسان ايىندا اقتاۋدا رۇقسات ەتىلمەگەن قوقىس قويمالارىن تازارتۋ جۇمىستارى ءۇشىن سول مەردىگەرمەن 84 ميلليون تەڭگەگە كەلىسىمشارتقا قول قويىلدى. مۇندا 2,5 گەكتار اۋماقتا 40000 توننانى وڭدەۋ جوسپارلانعان»، - دەلىنگەن اكىمدىك مالىمەتىندە.

اكىمشىلىك قۇقىق بۇزۋشىلىق تۋرالى كودەكستىڭ 505-بابىنا سايكەس 2021 - 2023 -جىلدار ارالىعىندا 99 ادام جالپى سوماسى 4524000 تەڭگەگە ايىپپۇل تولەۋگە مىندەتتەلگەن. سونداي-اق وسى كودەكستىڭ 434-بابىنىڭ 2-تارماقشاسى بويىنشا 7461 ادامعا جالپى كولەمى 88738000 تەڭگە ايىپپۇل تولەۋ جۇكتەلدى.

وبلىس اكىمى نۇرلان نوعايەۆ اكىمدىكتە زاڭسىز قوقىس ۇيىندىلەرىن جويۋ بويىنشا كەڭەس وتكىزدى. ايتۋىنشا، ءارتۇرلى جەرلەردە پايدا بولاتىن پوليگوندار ءوڭىر اۋداندارىنىڭ سىرتقى كەلبەتىنە عانا ەمەس، قورشاعان ورتاعا دا كەرى اسەر ەتۋى مۇمكىن. سول سەبەپتى ءاربىر تۇرعىندى بۇل ماسەلەگە جاۋاپكەرشىلىكپەن قاراۋعا شاقىردى.

اۆتور

گۇلميرا الياكپاروۆا