ەلىمىزدىڭ 5 وبلىسىندا «اۋىلدى دامىتۋ كومانداسى» پيلوتتىق جوباسى ىسكە قوسىلادى

جاڭا ءتاسىل ءار وتباسىنىڭ قاجەتتىلىكتەرى مەن مۇمكىندىكتەرىن ەسكەرە وتىرىپ، جەكە جۇمىس جۇرگىزۋدى كوزدەيدى. نەگىزگى ماقسات — اۋىل تۇرعىندارىنا جۇمىس تابۋعا، قاجەتتى داعدىلاردى مەڭگەرۋگە، ءوز ءىسىن اشۋعا جانە تابىسىن ارتتىرۋعا كومەكتەسۋ.

پيلوتتىق جوبا تۇركىستان، جامبىل، باتىس قازاقستان، پاۆلودار جانە قوستاناي وبلىستارىندا جۇزەگە اسىرىلادى. كوماندالار قۇرامىنا جۇمىسپەن قامتۋ، كاسىپكەرلىك، اۋىل شارۋاشىلىعى، سونداي-اق الەۋمەتتىك جانە قۇقىقتىق كومەك كورسەتۋ باعىتتارىنىڭ ماماندارى كىرەدى. ولار اۋىل وتباسىلارىنا قولجەتىمدى قولداۋ شارالارىن پايدالانۋعا كومەكتەسىپ، وقۋدان باستاپ گرانت الۋعا جانە ءوز ءىسىن باستاۋعا دەيىن سۇيەمەلدەيدى.

اۋدان دەڭگەيىندە جۇمىستى «اۋىل مەنەدجەرى» ۇيلەستىرەدى. ول تۇرعىندارعا جۇمىسقا ورنالاسۋ، ءبىلىم الۋ، گرانتتار مەن جەڭىلدەتىلگەن كرەديتتەر الۋ مۇمكىندىكتەرىن پايدالانۋعا كومەكتەسەدى. ساۋران اۋدانىنىڭ بابايقورعان اۋىلدىق وكرۋگىندە «اۋىل مەنەدجەرى» جۇمىسقا كىرىستى. مۇندا كوماندا جاساقتالىپ، اۋىل تۇرعىندارىن قولداۋ جونىندەگى ءىس-قيمىل جوسپارى بەكىتىلدى.

قولداۋ قۇرالدارىنىڭ ءبىرى — جىلدىق %2,5 مولشەرلەمەمەن جەڭىلدەتىلگەن ميكروكرەديت بەرۋدى كوزدەيتىن «اۋىل اماناتى» جوباسى.