ەلىمىزدە مۇناي وڭدەۋ كولەمى 4,7 پايىز ارتتى

استانا. KAZINFORM - مەملەكەت باسشىسى ەنەرگەتيكا ءمينيسترى ەرلان اقكەنجەنوۆتى قابىلدادى. اقوردانىڭ باسپا ءسوز قىزمەتىنىڭ حابارلاۋىنشا، قاسىم-جومارت توقايەۆقا وتىن- ەنەرگەتيكا كەشەنىن دامىتۋدىڭ بيىلعى ون ايداعى نەگىزگى ناتيجەلەرى، جىلىتۋ ماۋسىمى جانە الداعى كەزەڭگە ارنالعان جوسپارلار تۋرالى ەسەپ بەرىلدى.

Глава государства Касым-Жомарт Токаев принял министра энергетики Ерлана Аккенженова
فوتو: اقوردا

پرەزيدەنتكە جىلىتۋ ماۋسىمى ەلىمىزدىڭ بارلىق ايماعىندا قالىپتى ءوتىپ جاتقانى باياندالدى.

ەلەكتر ستانتسيالارىن جوندەۋگە ارنالعان قارجى 384 ميلليارد تەڭگەگە دەيىن ۇلعايتىلدى. نەگىزگى جابدىق پەن جەلىلەر جوندەلدى، جىلۋ ەلەكتر ورتالىقتارىنىڭ توزۋ دەڭگەيى تومەندەدى، سونداي-اق قاتەرلى «قىزىل ايماقتاعى» ستانتسيالاردىڭ سانى بەسكە دەيىن قىسقاردى.

ەلەكتر ەنەرگياسىن ءوندىرۋ 10 ايدا 2,3 پايىزعا ارتىپ، 102,4 ميلليارد ك ۆت/ساعاتقا جەتتى.

ەرلان اقكەنجەنوۆ مەملەكەت باسشىسىنا مۇناي وڭدەۋ كولەمى 4,7 پايىزعا وسكەنىن جانە جانار- جاعارمايدىڭ جالپى قورى 1,2 ميلليون تونناعا دەيىن كوبەيگەنىن ايتتى.

وتاندىق بيتۋم ءوندىرىسى (1,1 ميلليون توننا) ەلدىڭ ىشكى سۇرانىسىن تولىقتاي وتەدى.

شىمكەنت مۇناي وڭدەۋ زاۋىتىنىڭ قۋاتىن جىلىنا 12 ميلليون تونناعا دەيىن كەڭەيتۋ جانە اتىراۋ وبلىسىندا جاڭا مۇناي حيمياسى كەشەنىن سالۋ جوبالارى قولعا الىندى.

جىل سوڭىنا دەيىن حالىقتى گازبەن قامتاماسىز ەتۋ دەڭگەيى 64,5 پايىزعا جەتەدى. ناتيجەسىندە 13,2 ميلليون ازامات كوگىلدىر وتىننىڭ يگىلىگىن كورمەك.

قاشاعاندا جانە جاڭاوزەندە جاڭا گاز وڭدەۋ زاۋىتتارىنىڭ قۇرىلىسى ءجۇرىپ جاتىر. قاراشىعاناقتاعى جانە قاشاعانداعى ەكىنشى گاز وڭدەۋ زاۋىتتارىنىڭ جوباسى بويىنشا EPC- كەلىسىمشارتتار جاسالدى.

مەملەكەت باسشىسىنىڭ جولداۋدا ايقىنداعان مىندەتتەرىن ورىنداۋ ماقساتىندا مينيسترلىك ەنەرگيانى كوپ تۇتىناتىن دەرەكتەردى وڭدەۋ ورتالىقتارى مەن جاساندى ينتەللەكت قاجەتتىلىكتەرىن ەسكەرە وتىرىپ، ەلىمىزدىڭ 2035 -جىلعا دەيىنگى ءبىرىڭعاي ەنەرگەتيكالىق تەڭگەرىمىن قايتا قاراۋعا كىرىستى. ال گەولوگيالىق بارلاۋدى جانداندىرۋ ءۇشىن 112 كەن ۋچاسكەسى ەلەكتروندى اۋكتسيونعا شىعارىلدى. بۇل - رەكوردتىق كورسەتكىش.

سونىمەن قاتار پرەزيدەنتكە وتىن- ەنەرگەتيكا كەشەنى نىساندارىنىڭ سيفرلىق تەلنۇسقالارىن جانە 1,2 ميلليون تۇتىنۋشىعا كومىر جەتكىزۋ بارىسىنا مونيتورينگ جاسايتىن ءبىرىڭعاي پلاتفورمانى ەنگىزۋ جونىندە مالىمەت بەرىلدى.

كەزدەسۋ سوڭىندا پرەزيدەنت قاسىم-جومارت توقايەۆ حالىقتى ەنەرگيامەن جانە جىلۋمەن تولىق قامتاماسىز ەتۋ، جانار-جاعارماي مەن كومىر نارىقتارىنىڭ تۇراقتىلىعىن قاتاڭ باقىلاۋدا ۇستاۋ، سونداي-اق ينۆەستيتسيالىق جوبالاردى ساپالى جۇزەگە اسىرۋ جونىندە ءبىرقاتار تاپسىرما بەردى.