ۇلىتاۋدا قۇلدىقتاعى بالالارعا ەمحانا انىقتاما بەرىپ كەلگەن - وقيعا نەگە 5 جىلدان كەيىن انىقتالدى
استانا. KAZINFORM - ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا ۇلىتاۋدا 5 جىل بويى قۇلىقتا بولعان بالالاردىڭ قالاي انىقتالعانىن ايتىپ بەردى.
«ۇلىتاۋ وبلىسىنداعى بالالاردىڭ جاي-كۇيى نەگە 5 جىلدان كەيىن انىقتالدى؟ قامقورشى ورگاندار تەكسەرۋ جۇرگىزبەدى مە؟ ەندى قانداي شارا قولدانىلادى؟»، - دەپ سۇراق قويدى تىلشىلەر ورتالىق كوممۋنيكاتسيالار قىزمەتىندە.
ءوز جاۋابىندا ن. وسپانوۆا قامقورشى ورگاندار «نەكە جانە وتباسى» كودەكسىنە سايكەس، جارتى جىل سايىن تەكسەرۋ جۇرگىزىلىپ تۇرعانىن ايتتى.
«2023-جىلدىڭ قىركۇيەگىندە قامقورشىلىق ورگاندار العاش كۇدىكتەنە باستادى. ويتكەنى بالالار كەزەك-كەزەك ءبىر اپتادان ساباقتان قالىپ وتىرعان. بۇل جاعداي قاڭتار ايىنا دەيىن 4 اي بويى جالعاسقان. ەڭ قىزىعى، ەمحانا بالالاردىڭ اۋىرىپ قالعانى تۋرالى انىقتاما بەرىپ وتىرعان»، - دەدى سپيكەر.
قاڭتار ايىندا بالالاردىڭ قۇقىقتارىن قورعاۋ كوميتەتى بالالار تاريبەلەنىپ جاتقان بارلىق وتباسىنى تەكسەرىپ شىعۋعا تاپسىرما بەرگەن. وسى تەكسەرۋ اياسىندا ۇلىتاۋ وبلىسىندا قۇلدىقتا بولعان بالالار تابىلعان.
«قازىر قىلمىستىق ءىس ءجۇرىپ جاتىر، تيىسىنشە، قامقورشىلىق ورگانىنا، ەمحانا، مەكتەپ جانە كوللەدج قىزمەتكەرلەرىنە قاتىستى پروتسەستەر تەكسەرىلۋدە. ارينە، اسىراپ العان اتا-انالار دا جاۋاپكەرشىلىكتەن قۇتىلمايدى. مۇنداي جاعدايدا 111 تەلەفونىنا حابارلاسۋ كەرەك. كەز كەلگەن كۇدىكتى جايتتى بايقاساڭىز، بەيقام ءوتىپ كەتپەڭىز. ماسەلەن، كورشىلەر، مۇعالىمدەر، ءوتىپ بارا جاتقان ادامدار، تۋىستار، دوستار، قۇربىلار. بالاعا قاتىستى ءاربىر جاعداي تۋرالى حابارلاۋ وتە ماڭىزدى»، - دەپ قورىتىندىلادى ناسىمجان وسپانوۆا.
ەسكە سالا كەتەيىك، 17-اقپاندا ۇلىتاۋ وبلىسىندا 5 جىل بويى فەرمادا جۇمىسقا جەگىلىپ، «قۇلدىقتا» بولعان بالالار قۇتقارىلدى.
19-اقپاندا كۇدىكتى ايەل ۇستالدى.
اۆتور
ايجان سەرىكجان قىزى
