ۇلىتاۋ وبلىسىندا پەرزەنتحانا جوق - بەرىك ءابدىعالي ۇلى
ۇلىتاۋ وبلىسىنىڭ اكىمى بەرىك ءابدىعالي ۇلى Jibek Joly تەلەارناسىنداعى «ۋادە» باعدارلاماسىندا وبلىس بولىنگەلى قانداي جۇمىستار اتقارىلىپ جاتقانىن ايتتى، دەپ حابارلايدى Kazinform.
«ءبىزدىڭ وبلىس قاراعاندى وبلىسىنان بولىنگەندە اياقتالماي قالعان بىرنەشە پروبلەما بولدى. بيىل دا شەشىلمەگەن ماسەلەلەر بار. ماسەلەن، جەزقازعان قالاسىندا 12 جىلدان بەرى سالىنباي تۇرعان 320 ورىندىق بالاباقشا بار. قۇرىلىسى بىتپەگەن سپورت كەشەنى بار، وندا ەكى مەردىگەر سوتتاسىپ جاتىر. تەرەكتى اۋىلىندا مەكتەپتىڭ قۇرىلىسى اياقتالماعان، ساتپايەۆ قالاسىندا بالاباقشا مەن وقۋشىلار سارايى، اقتۇبەك اۋىلىنداعى سپورت زالى سەكىلدى ورتا جولدا قالعان جوبالار كوپ»، - دەدى بەرىك ءابدىعالي ۇلى.
اكىمنىڭ ايتۋىنشا، جەزقازعاندا وبلىس ورتالىعى بولماعان 25 جىلدا الەۋمەتتىك نىسانداردان ءبىر مەكتەپ قانا سالىنعان.
«پاندەميا كەزىندە بەرىلگەن مودۋلدىك اۋرۋحانانى ەسەپتەمەگەندە، باسقا نىساندار سوعىلمادى. مەملەكەت باسشىسىنىڭ وبلىستى ءبولۋ تۋرالى ادىلەتتى شەشىمى شىققاندا حالىق قۋاندى. جوبالار باستالۋىن باستالعان، ءبىراق سوڭىندا مەردىگەرلەر سوتتاسىپ، تالاسىپ، سىبايلاس جەمقورلىققا بايلانىستى توقتاتىلعان نىساندار بار. ءبىرىنشى كەزەكتە وسىلاردى قولعا الدىق. ءبىر مەكتەپتىڭ قۇرىلىسى پروبلەمالىق بولعاندىقتان مۇلدەم المادىق، ونى قاراعاندى وبلىسىنىڭ ءوزى كەلەسى جىلى اياقتاپ بەرەتىن بولدى»، - دەدى ب. ءابدىعالي ۇلى.
سونىمەن بىرگە، اكىم وبلىستا بالالار اۋرۋحاناسى جوق ەكەنىن، كوپتەگەن مەديتسينالىق مەكەمە جابىلىپ قالعانىن باسا ايتتى.
«ولاردى قالپىنا كەلتىرۋ ءۇشىن تاعى 2-3 جىل ۋاقىت قاجەت. ءبىرىنشى كەزەكتە ۇكىمەتكە جۇگىنىپ، پەرزەنتحانانىڭ جوبالىق- سمەتالىق قۇجاتتاماسىن ازىرلەپ جاتىرمىز. بوساناتىن ايەلدەر كوپسالالى اۋرۋحانا ىشىندەگى بولىمگە بارادى. ال جاڭا زاماناۋي قوندىرعىلارى بار بولەك پەرزەنتحانا عيماراتى جوق. ونكولوگيالىق ديسپانسەر جوق، بۇل دا اۋرۋ دا ارتىپ كەلە جاتىر. بۇل تەك دەنساۋلىق سالاسى عانا. قازىر وسىنىڭ ءبارىن ەسەپتەۋ، قۇجاتتارىن دايىنداۋ جۇمىستارى ءجۇرىپ جاتىر. قاراجاتتى ۇكىمەتتەن سۇراپ جاتىرمىز»، - دەدى وبلىس اكىمى.
اۆتور
ايجان سەرىكجان قىزى
