ۇلىتاۋ وبلىسى قالاي قۇرىلدى - اكىم ەستەلىگى

ۇلىتاۋ وبلىسىنىڭ اكىمى بەرىك ءابدىعالي ۇلى Jibek Joly تەلەارناسىنداعى «ۋادە» باعدارلاماسىندا وبلىستىڭ قالاي بولىنگەنىن ايتىپ بەردى، دەپ حابارلايدى Kazinform.

ءوز سوزىندە اكىم وبلىستى جاڭادان قۇرۋ قيىن ەكەنىن باسا ايتتى.

«ءبىز قاراعاندىدان، استانادان كوپ مامان كەلەدى دەپ ۇمىتتەنىپ ەدىك. ءبىراق جەزقازعانعا كادر كوپ كەلمەدى. كوبىنە جەزقازعان، ۇلىتاۋ، ساتپايەۆ، قاراجالدان قىزمەتكەرلەردى، اۋدان، قالا اكىمدەرىنىڭ ورىنباسارلارىن باسقارما باسشىسى ەتىپ تاعايىندادىق. ولار دا وبلىستىق دەڭگەيدە جۇمىس ىستەپ كورمەگەن. سولاي ءبىر جىلدا تاجىريبە جيناقتادى، تاجىريبە بولماعان سوڭ قاتەلىكتەر دە بولدى. قاراعاندى وبلىسىنان ساباقتاستىق بولار، ول جاقتان قىزمەتكەرلەر، قۇجاتتار كەلەدى دەپ ويلادىق. ءىس جۇزىندە باسقارمانى قۇردىق تا، ءبارىن تازا پاراقتان باستادىق»، - دەدى بەرىك ءابدىعالي ۇلى.

سپيكەردىڭ ايتۋىنشا، ۇلىتاۋ وبلىس رەتىندە اشىلسا دا، تۇرعىنداردىڭ باسقا ايماقتارعا كوشۋى ءالى توقتاعان جوق.

«بيىلدىڭ وزىندە كەرى سالدو - مىڭنان استام ادام. ارينە، كوشىپ كەلۋشىلەر جانە قالۋشىلار كوپ بولۋى كەرەك. ءبىراق جەزقازعاندا ءۇيدىڭ باعاسى وتە قىمبات. مۇنداعى ءۇي باعاسى استانامەن، الماتىمەن بىردەي. ەكى مىڭداي قىزمەتكەر كەلدى، ولاردىڭ بارىنە جالعا الۋ وتە قىمبات»، - دەپ تولىقتىردى ب. ءابدىعالي ۇلى.

بۇعان دەيىن بەرىك ءابدىعالي ۇلى ۇلىتاۋ وبلىس رەتىندە بولىنگەلى قانداي جۇمىستار اتقارىلىپ جاتقانىن بايانداعان ەدى.

اۆتور

ايجان سەرىكجان قىزى