ەلىمىزدەگى سۋ قويمالارى تاسقىنعا توتەپ بەرىپ جاتىر ما

استانا. KAZINFORM - سۋ رەسۋرستارى جانە يرريگاتسيا مينيسترلىگىنىڭ رەسمي وكىلى ءمولدىر ابدۋاليەۆا ەل اۋماعىنداعى سۋ قويمالارىنىڭ قازىرگى جاعدايىمەن تانىستىردى.

قوستاناي وبلىسىنىڭ قاراتومار سۋ قويماسىنان سەكۋندىنا 3250 تەكشە مەتر سۋ جىبەرىلىپ، %99 تولدى. سۋ قويماسى ترانزيتتىك رەجيمدە جۇمىس ىستەپ جاتىر، سۋ جىبەرۋ كولەمى ۇلعايۋى مۇمكىن. قوستاناي وبلىسىندا سۋ تاسقىنى جالعاسىپ جاتىر. قازىرگى ۋاقىتتا مينيسترلىك پەن اكىمدىك قىزمەتكەرلەرى سۋ جىبەرۋ بويىنشا بىرلەسىپ جۇمىس ىستەپ جاتىر.

سولتۇستىك قازاقستان وبلىسىندا سەرگەيەۆ سۋ قويماسىنان سەكۋندىنا 3820 تەكشە مەتر سۋ جىبەرىلەدى. پەتروپاۆل سۋ قويماسىنان سەكۋندىنا 73 تەكشە مەتر سۋ جىبەرىلىپ جاتىر، ەكى سۋ قويماسى دا %100 تولدى. وبلىستا سۋ تاسقىنى جالعاسىپ جاتىر. قازىر بۇل وڭىردە سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ سۋ وتكىزۋدى رەتتەۋ جۇمىسىن جەكە قاداعالاپ ءجۇر.

استانا سۋ قويماسى ترانزيتتىك رەجيمگە كوشتى. قازىر سەكۋندىنا 400 تەكشە مەتر سۋ جىبەرىلىپ جاتىر جانە سول كولەمدە تاعى سۋ كەلىپ جاتىر. اقمولا وبلىسىنىڭ سەلەتين سۋ قويماسىنان سەكۋندىنا 150 تەكشە مەتر سۋ جىبەرىلەدى، قازىر سۋ قويماسى %99,4 تولدى.

باتىس قازاقستان وبلىسى

وڭىردە ءالى كۇنگە دەيىن شاعان وزەنى دەڭگەيىنىڭ كوتەرىلۋى بايقالادى، مۇندا سەكۋندىنا 680 تەكشە مەتر سۋ جىبەرىلىپ جاتىر، دەركول وزەنى بويىنشا سۋ دەڭگەيى تومەندەدى. جايىق وزەنىندە سۋ تاسقىنىنىڭ ەكىنشى تولقىنى بولۋى مۇمكىن.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ رەسەيلىك ارىپتەستەرىمەن الماسىپ جاتقان دەرەكتەرىنە سۇيەنسەك، بۇگىندە يريكلين سۋ تورابىنان سەكۋندىنا 1680 تەكشە مەتر سۋ جىبەرىلەدى. ەڭ جوعارعى قارقىن 4-ساۋىردە بولعان، سەكۋندىنا 2600 تەكشە مەتر.

سۋ رەسۋرستارى جانە يرريگاتسيا مينيسترلىگىنىڭ قىزمەتكەرلەرى باتىس قازاقستان جانە اتىراۋ وبلىستارى اكىمدىكتەرىنىڭ ماماندارىمەن بىرگە جايىق وزەنىنىڭ ارناسىن تازارتۋ جانە سۋ باسۋدى ازايتۋ ءۇشىن كەپتەلىستىڭ الدىن الۋ بويىنشا جۇمىس جۇرگىزىپ جاتىر.

اقتوبە وبلىسى

قازىرگى ۋاقىتتا اقتوبە وبلىسىنىڭ سۋ قويماسىندا جاعداي تۇراقتى. نىسان %97 تولدى، سەكۋندىنا 50 تەكشە مەتر سۋ جىبەرىلىپ جاتىر. قارعالى سۋ قويماسى ترانزيتتىك رەجيمدە جۇمىس ىستەپ تۇر. سۋ قابىلداۋ جانە وتكىزۋ كولەمى سەكۋندىنا 350 تەكشە مەتر.

شىعىس قازاقستان وبلىسى

كەلەسى اپتانىڭ باسىندا شىعىس قازاقستان وبلىسىنىڭ سۋ قويمالارىندا سۋ تاسقىنى بەلەڭ الادى دەپ بولجانىپ وتىر. بۇقتىرما سۋ قويماسىنا كۇتىلەتىن ورتاشا اعىن 1780-2720 ملن تەكشە مەتر، ءشۇلبى سۋ قويماسىنا - 2380-3730 ميلليون تەكشە مەتر.

سونىمەن قاتار ەرتىس وزەنى بويىنشا سۋ اعىنى بولۋى مۇمكىن. سوندىقتان اباي، شىعىس قازاقستان جانە پاۆلودار وبلىستارىندا اكىمدىكتەر مەن سۋ رەسۋرستارى جانە يرريگاتسيا مينيسترلىگىنىڭ قىزمەتكەرلەرى سۋ وتكىزۋ جانە تۇرعىنداردىڭ قاۋىپسىزدىگىن قامتاماسىز ەتۋ بويىنشا قاجەتتى ءىس-شارالاردى اتقارىپ جاتىر.

قاراعاندى وبلىسى

قاراعاندى وبلىسىنىڭ سۋ قويمالارىندا سۋ تاسقىنىنىڭ شارىقتاۋ كەزەڭى ءوتتى، سۋ قويمالارى ترانزيتتىك رەجيمگە كوشتى. سۋ قويمالارى ارقىلى وزەندەردىڭ اعىنىن رەتتەۋ ناتيجەسىندە قاراعاندى وبلىسىنداعى سۋ قويمالارىنان تومەن ورنالاسقان ەلدى مەكەندەردى سۋ باسۋ قاۋپى بارىنشا ازايدى.

«بۇگىنگى تاڭدا نەگىزگى كۇش وزەندەردىڭ اعىنىن رەتتەۋ جانە تاسقىن سۋىن وتكىزۋ ءۇشىن بارلىق گيدروتەحنيكالىق قۇرىلىستار مەن سۋ قويمالارىنىڭ قاۋىپسىز جۇمىسىن قامتاماسىز ەتۋگە باعىتتالعان. بارلىق سۋ شارۋاشىلىعى نىساندارىندا تاۋلىك بويى كەزەكشىلىك ۇيىمداستىرىلىپ، سۋ شارۋاشىلىعى جاعدايىنا ساعات سايىن مونيتورينگ جۇرگىزىلىپ جاتىر. سونداي- اق سۋ قويمالارىنان سۋ جىبەرۋ جونىندەگى سوڭعى مالىمەتتەر اكىمدىكتەر جانە جەدەل شتابقا ساعات سايىن جىبەرىلىپ جاتىر»، - دەپ تولىقتىردى اتالعان ۆەدومستۆونىڭ رەسمي وكىلى م. ابدۋاليەۆا.

اۆتور

داۋلەت ىزتىلەۋ