ەلىمىزدەگى كورەيلىك ميكروقارجى ۇيىمى بانككە اينالماق
استانا. KAZINFORM - ەلىمىزدەگى كورەيلىك BNK Finance Kazakhstan ميكروقارجى ۇيىمىن بانككە اينالدىرۋدى قولدايمىن. بۇل تۋرالى اقوردادا وڭتۇستىك كورەيا پرەزيدەنتى يۋن سوك يەلمەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم- جومارت توقايەۆ ايتتى.

«بۇگىن بانكتىك قاداعالاۋ سالاسىنداعى ءوزارا تۇسىنىستىك تۋرالى مەموراندۋمعا قول قويىلدى. جاڭا قۇجات ارقىلى ينۆەستيتسيالار قاۋىپسىزدىگىن باقىلاۋدىڭ ءتارتىبى رەتتەلمەك. ەلىمىزدە كورەيلىك BNK Finance Kazakhstan ميكروقارجى ۇيىمى بار. مەن ونى ەكىنشى دەڭگەيدەگى بانككە اينالدىرۋ تۋرالى شەشىمدى قولدايمىن»، - دەدى مەملەكەت باسشىسى.
پرەزيدەنت ەكى ەل اراسىنداعى عىلىم جانە ءبىلىم سالاسىنداعى ىنتىماقتاستىق تا ۇدايى نىعايتىلىپ كەلە جاتقانىن ايتتى.
«قازىرگى تاڭدا كورەيانىڭ جوعارى وقۋ ورىندارىندا مىڭنان استام قازاق جاستارى ءبىلىم الىپ جاتىر. وزدەرىڭىزگە ءمالىم، قازاقستان تەحنيكالىق ماماندار دايارلاۋ ماسەلەسىنە ەرەكشە كوڭىل بولەدى. بۇعان كورەيالىق ارىپتەستەرىمىز قولداۋ كورسەتىپ وتىر. ەلدەرىمىز عىلىم جانە تەحنولوگيا سالاسىنداعى ىنتىماقتاستىقتى دامىتا تۇسۋگە كەلىستى. وسىعان وراي تۇركىستاندا كورەيانىڭ Woosong ۋنيۆەرسيتەتىنىڭ فيليالى اشۋ ماسەلەسى پىسىقتالادى»، - دەدى قاسىم-جومارت توقايەۆ.
پرەزيدەنت مادەني- گۋمانيتارلىق بايلانىستى كۇشەيتۋگە دە باسا نازار اۋدارىلعانىن ايتتى.
«قازاقستاندا تۇرىپ جاتقان كورەي دياسپوراسىنىڭ ءوز ءتىلىن ساقتاپ، دامىتۋىنا قولداۋ كورسەتىلەدى. وسى ماقساتپەن ەكى ەل اۋماعىندا تۇراقتى تۇردە مادەني شارالار وتكىزۋگە ۋاعدالاستىق. قازىرگى تاڭدا قازاقستان ازاماتتارى كورەياعا 30 كۇنگە دەيىن ۆيزاسىز بارا الادى. تاياۋ ارادا استانا- سەۋل باعىتىندا تىكەلەي رەيس اشىلادى. اۋە رەيستەرىنىڭ ۇلعايۋى ەكى ەل اراسىنداعى بايلانىستى نىعايتا تۇسەتىندىگى ءسوزسىز»، - دەدى مەملەكەت باسشىسى.
اۆتور
مارلان جيەمباي