ەلىمىزدەگى جولاۋشىلار ۆاگونى قاشان تولىق جاڭارادى
استانا. KAZINFORM - «جولاۋشىلار تاسىمالى» ا ق باس ديرەكتورى جانىبەك تايجانوۆ ەلىمىزدەگى جولاۋشىلار ۆاگونى قاشان تولىق جاڭاراتىنىن ايتتى.
سەناتتىڭ جالپى وتىرىسىنان كەيىن ب ا ق وكىلدەرى كومپانيا باسشىسىنان ەلىمىزدە قانشا ەسكى جولاۋشىلار ۆاگونى بار ەكەنىن سۇراعان بولاتىن.
«ءبىزدىڭ، ۇلتتىق تاسىمالداۋشىنىڭ پاركىندە مۇنداي شامامەن 600 ۆاگون بولسا، جەكە تاسىمالداۋشىلاردا دا ەسكى ۆاگوندار بار. ولار 80-90 -جىلدارى شىعارىلعان، پايدالانىلعانىنا 28 جىلدان اسىپ كەتتى. مۇنداي ۆاگونداردا اۋا باپتاۋ جۇيەسى شىعارۋشى زاۋىت تاراپىنان قاراستىرىلماعان، دارەتحانالارى دا ستاندارتتى ەمەس. ولاردىڭ ەسەپتەن شىعارۋ مەرزىمى بار. 2030 -جىلى بارلىق ەسكى ۆاگون ەسەپتەن شىعارىلادى»، - دەدى ول.
ونىڭ ايتۋىنشا، قازىرگى ۋاقىتتا كومپانيا ەسكى ۆاگونداردى جاڭارتۋ، جاڭا ۆاگوندار ساتىپ الۋ جۇمىستارىن جۇرگىزىپ جاتىر.
«قازىردىڭ وزىندە شامامەن 150 ۆاگون ساتىپ الىنىپ، 157 ۆاگونعا كەلىسىمشارت جاسالدى. 2025 -جىلى شتادلەر جاڭا ۆاگوندارى جەتكىزىلەدى دەپ كۇتىپ وتىرمىز. 2030 -جىلعا قاراي پاركتىڭ ورتاشا جاسى شامامەن 10-13 جىل بولادى جانە ولار جاقسى، جاڭا ۆاگوندار»، - دەدى جانىبەك تايجانوۆ.
اۆتور
مارلان جيەمباي
