ەلىمىزدىڭ دەنساۋلىق ساقتاۋ جۇيەسىندە مەيىرگەرلەردىڭ ءرولى ەداۋىر ارتتى - د س م
استانا. KAZINFORM - بۇگىن، 12- مامىر، قازاقستاندا جانە بۇكىل الەمدە حالىقارالىق مەيىرگەر كۇنى - 141 ەلدىڭ مەيىرگەرلەر قاۋىمداستىعىن بىرىكتىرەتىن كاسىبي مەرەكە اتالىپ ءوتىپ جاتىر.
ق ر دەنساۋلىق ساقتاۋ مينيسترلىگى باسپا ءسوز قىزمەتىنىڭ حابارلاۋىنشا، بۇگىندە ەلىمىزدىڭ دەنساۋلىق ساقتاۋ جۇيەسىندە 190 مىڭنان استام ورتا بۋىن مەديتسينا قىزمەتكەرى، ولاردىڭ 146 مىڭنان استامى - مەيىرگەر جۇمىس ىستەيدى، ال اۋىلدىق جەرلەردە شامامەن 55 مىڭ مامان ەڭبەك ەتۋدە.
سوڭعى جىلدارى ەلىمىزدىڭ دەنساۋلىق ساقتاۋ جۇيەسىندە مەيىرگەرلەردىڭ ءرولى ەداۋىر ارتتى. قىزمەت اياسىن كەڭەيتۋ جانە وكىلەتتىكتەردى بەرۋ ارقىلى مەيىرگەرلەر مەديتسينالىق كومەكتى كوماندالىق ۇلگىدە كورسەتۋ جۇيەسىنىڭ اجىراماس بولىگىنە اينالدى.
بۇل دارىگەرلەردىڭ جۇكتەمەسىن ازايتۋعا، پاتسيەنتتەر اعىنىن ءتيىمدى ۇيلەستىرۋگە، سونداي-اق مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋعا مۇمكىندىك بەردى.
بۇگىندە كەڭەيتىلگەن پراكتيكا مەيىرگەرلەرى ءوز بەتىنشە كەلەسى قىزمەتتەردى اتقارادى:
• پاتسيەنتتەردى باستاپقى قابىلداۋ جانە ديناميكالىق باقىلاۋ؛
• مەديتسينالىق قۇجاتتار مەن ەلەكتروندىق جازبالاردى جۇرگىزۋ؛
• دارىگەردىڭ تاعايىنداۋى بويىنشا اقپاراتتىق جۇيەلەر ارقىلى تەگىن رەتسەپت جازۋ؛
• پاتسيەنتتەر اعىنىن رەتتەۋ جانە سۇرىپتاۋ، قابىلداۋعا جازۋ؛
• اكتيۆتەردى تىركەۋ جانە تۇرعىنداردى م س ا ك ۇيىمدارىنا تىركەۋ.
مەيىرگەرلەردىڭ جاۋاپكەرشىلىك سالاسىنا سونىمەن قاتار:
• ديسپانسەرلىك ەسەپتەگى پاتسيەنتتەرمەن جۇمىس؛
• سوزىلمالى اۋرۋلاردى باسقارۋ باعدارلاماسى جانە امبەباپ- پروگرەسسيۆتى پاتروناج مودەلى شەڭبەرىندە كونسۋلتاتسيا بەرۋ، وقىتۋ جانە پاتروناج؛
• ۆاكسيناتسيالاۋ مەن سكرينينگتەردى قوسا العاندا پروفيلاكتيكا شارالارى؛
• مەديتسينالىق كومەك كورسەتۋدىڭ بارلىق دەڭگەيدەگى حالىقتىڭ دەنساۋلىعىن نىعايتۋعا قاتىسۋ جاتادى.
دەنساۋلىق ساقتاۋ مينيسترلىگى مامانداردى دايارلاۋدىڭ ساتىلى جۇيەسىن ەنگىزدى: ستاندارتتى دەڭگەيدەن باستاپ مامانداردىڭ قۇزىرەتتەرىنە قويىلاتىن تالاپتارعا سايكەس كەلەتىن «باكالاۆريات - ماگيستراتۋرا - دوكتورانتۋرا» اكادەميالىق دارەجەلەرىنە دەيىن.
قازاقستاندا مەيىرگەرلەردى 94 مەديتسينالىق كوللەدج دايارلايدى، ونىڭ ىشىندە 22- ءسى - مەملەكەتتىك، 72- ءسى - جەكەمەنشىك. ولاردىڭ 39-ى - جوعارى مەديتسينالىق كوللەدج مارتەبەسىنە يە.
جىل سايىن ەلىمىزدە 23000-نان استام جالپى بەيىندى مامان دايارلانادى، ال سوڭعى التى جىلدىڭ ىشىندە قولدانبالى باكالاۆريات ديپلومى بار 20000-نان استام مەيىرگەر دەنساۋلىق ساقتاۋ مەكەمەلەرىنە جۇمىسقا ورنالاستىرىلدى.
مەيىرگەر ءىسىن دامىتۋ جۇمىستارىن ۇيلەستىرۋ ماقساتىندا ەلىمىزدىڭ 20 وڭىرىندە وڭىرلىك ۇيلەستىرۋشىلەر تاعايىندالدى. ولاردىڭ قاتارىندا - پراكتيكالىق دەنساۋلىق ساقتاۋ سالاسىنىڭ، ءبىلىم بەرۋ ۇيىمدارىنىڭ جانە باسقارۋ ورگاندارىنىڭ وكىلدەرى بار.
- قازاقستان رەسپۋبليكاسى دەنساۋلىق ساقتاۋ مينيسترلىگى بارلىق مەيىرگەرلەرگە حالىقتىڭ دەنساۋلىعىن ساقتاۋ ىسىنە قوسقان باعا جەتپەس ۇلەسى، بىلىكتىلىگى، جاناشىرلىعى مەن ادالدىعى ءۇشىن شىن جۇرەكتەن العىس بىلدىرەدى. تەك مەيىرگەرلەر عانا ءارقاشان پاتسيەنتتىڭ جانىنان تابىلادى، ءومىردىڭ ەڭ قيىن ءارى جاۋاپتى ساتتەرىندە قولداۋ كورسەتەدى، - دەلىنگەن حابارلامادا.
سونداي-اق وندا كاسىبي مەرەكەگە بايلانىستى 14-16-مامىر كۇندەرى تۇركىستان قالاسىندا «مەيىرگەر قىزمەتىنىڭ يننوۆاتسيالارى مەن دامۋ پەرسپەكتيۆالارى» اتتى حالىقارالىق فورۋم جانە قىزىلوردا قالاسىندا «ق ر- دا تاۋەلسىز مەيىرگەر ءىسىنىڭ ەڭ ۇزدىك پراكتيكالارىن ەنگىزۋ» تاقىرىبىندا حالىقارالىق عىلىمي-پراكتيكالىق كونفەرەنسيا وتەتىن ايتىلعان.
وسىعان دەيىن ولجاس بەكتەنوۆ ۇكىمەتتىڭ دەنساۋلىق ساقتاۋدى جەتىلدىرۋ بويىنشا بارلىق شارانى قابىلداپ جاتقانى تۋرالى ايتقان بولاتىن.
