ەلىمىزدە يتاليانىڭ بىرنەشە ۋنيۆەرسيتەتىنىڭ فيليالى اشىلۋى مۇمكىن

استانا. KAZINFORM - تالدىقورعاندا يتاليانىڭ ماركە پوليتەحنيكالىق ۋنيۆەرسيتەتىنىڭ فيليالى اشىلادى. بۇل تۋرالى اقوردادا عىلىم جانە جوعارى ءبىلىم ءمينيسترى ساياسات نۇربەك ايتتى.

- ول تولىققاندى كامپۋس، قازىردىڭ وزىندە عيماراتىن، باعدارلاماسىن ازىرلەپ قويدىق. وندا يتاليادان كەلگەن وقىتۋشىلار دا جۇمىس ىستەيدى. ايتا كەتەرلىگى، ولارعا ءوڭىر، تابيعاتى ۇنادى، - دەدى مينيستر.

ونىڭ اتاپ وتۋىنشە، مۇنان بولەك عىلىم مينيسترلىگى يتاليانىڭ تاعى 2 جەتەكشى ۋنيۆەرسيتەتىمەن كەلىسسوز جۇرگىزىپ جاتىر.

- ولار: لا ساپيەنسا ريم مەملەكەتتىك ۋنيۆەرسيتەتى مەن يتالياداعى جەتەكشى تەحنولوگيالىق جوعارى وقۋ ورىندارىنىڭ ءبىرى - ميلان پوليتەحنيكالىق ۋنيۆەرسيتەتى. سونىمەن قاتار تۋرين پوليتەحنيكالىق ۋنيۆەرسيتەتىمەن دە الدىن الا ۋاعدالاستىق بولعان ەدى. تۋرين - اۆتوموبيل جاساۋ جانە ونەركاسىپتىك ديزاين ورتالىعى. كەلەسى جىلى-اق جاقسى جاڭالىقپەن قۋانتامىز دەپ ۇمىتتەنەمىن، - دەدى ساياسات نۇربەك.

سونىمەن قاتار مينيستر قىركۇيەكتە يتاليا پرەزيدەنتىنىڭ قازاقستانعا ساپارى جوسپارلانعانىن، ونىڭ اياسىندا جاڭا كەلىسىمدەر جاريا ەتىلەتىندىگىن ايتتى.

ەسكە سالا كەتسەك، سوڭعى 3 جىلدىڭ ىشىندە ەلىمىزدە ەڭ مىقتى 38 شەتەلدىك ۋنيۆەرسيتەتتىڭ فيليالى اشىلدى.

اۆتور

مارلان جيەمباي