ەلىمىزدە وتەتىن دۇنيەجۇزىلىك كوشپەندىلەر ويىندارىنا 100 دەن اسا ەلدىڭ سپورتشىلارى قاتىسادى

Елімізде өтетін Дүниежүзілік көшпенділер ойындарына 100-ден аса елдің спортшылары қатысады
Фото: Мақсат Шағырбаев/Kazinform

استانا. KAZINFORM - استانادا V دۇنيەجۇزىلىك كوشپەندىلەر ويىندارىن وتكىزۋگە بەلسەندى دايىندىق جۇرگىزىلىپ جاتىر. جىلدىڭ باستى وقيعالارىنىڭ ءبىرى قىركۇيەك ايىندا وتەدى.

استانا قالاسى اكىمدىگى باسپا ءسوز قىزمەتىنىڭ مالىمەتىنشە، 8-14-قىركۇيەك ارالىعىندا وتەتىن كوشپەندىلەر ويىندارىنا جۇزدەن اسا ەلدىڭ ءتورت مىڭعا جۋىق وكىلى قاتىسادى دەپ جوسپارلانعان. قازىردىڭ وزىندە بۇل اۋقىمدى ءىس-شاراعا 107 مەملەكەت قىزىعۋشىلىق تانىتقان.

ويىندار 3 نەگىزگى باعىتتان تۇرادى: سپورت، مادەنيەت، عىلىم. ماسەلەن، سپورتتىڭ 20 تۇرىنەن 110 مەدال ساراپقا سالىنادى. سپورتتىق باعدارلامادا ۇلتتىق ات سپورتى، ۇلتتىق كۇرەس تۇرلەرى، ءداستۇرلى ساداق اتۋ، اڭ اۋلايتىن قۇستارمەن اڭ اۋلاۋ جانە زياتكەرلىك سپورت تۇرلەرى بويىنشا جارىستار وتكىزىلەدى. سونداي-اق كورمە باعدارلاماسىنا 10 ءتۇرلى ەتنيكالىق سپورت ءتۇرى كىرەدى.

سپورتتىق باعدارلامانىڭ نىساندارى سىزىقتىق جۇيە بويىنشا ءبىر-بىرىنە وتە جاقىن ورنالاسقان.

قاتىسۋشىلاردى قوناق ۇيدەن جارىس ورنىنا دەيىن ىڭعايلى تاسىمالداۋ پىسىقتالدى.

ويىنداردى وتكىزۋ ءۇشىن ەلوردانىڭ 6 نەگىزگى سپورتتىق ينفراقۇرىلىمى بەكىتىلدى: «استانا-ارەنا» ستاديونى، ج. ۇشكەمپىروۆ اتىنداعى جەكپە-جەك سارايى، «الاۋ» مۇز ايدىنى سارايى، «قازاقستان» جەڭىل اتلەتيكا سپورت كەشەنى، «دۋمان» قوناق ءۇي كەشەنى، «قازانات» يپپودرومى.

مادەني باعدارلامانىڭ نەگىزگى الاڭى «قازانات» يپپودرومىنا ىرگەلەس «كوشپەندىلەر الەمى» ەتنواۋىلى بولماق.

ۇلتتىق مۋزەيدە ەتنوسپورتتى دامىتۋدىڭ ءتۇرلى اسپەكتىلەرى زەرتتەلەتىن حالىقارالىق عىلىمي-پراكتيكالىق كونفەرەنسيا وتەدى.

ويىنداردى ۇيىمداستىرۋعا 1000 عا جۋىق ەرىكتى قاتىسادى. ۆولونتەر بولۋعا 18 جاستان اسقان كەز كەلگەن استانالىقتىڭ مۇمكىندىگى بار.

اۆتور

ەلميرا ورالبايەۆا

سوڭعى جاڭالىقتار