ەلىمىزدە ۋتيل الىمعا قاتىستى ەشقانداي وزگەرىس بولمايدى - قانات شارلاپايەۆ

Көлік салығы: Павлодарлықтар мемлекетке 650 млн теңге қарыз
Фото: freepik.com

استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ ەلىمىزدە ۋتيل الىمعا قاتىستى ەشقانداي وزگەرىس بولمايتىنىن ءمالىم ەتتى.

بۇگىن پارلامەنت ماجىلىسىندەگى باسپا ءسوز ءماسليحاتىندا تىلشىلەر مينيستردەن «ۋتيل الىمدى تومەندەتۋگە ۆەدومستۆو نەگە قارسى؟» ەكەنىن سۇرادى.

«قازىرگى كەزدە ۋتيليزاتسيا الىمىنا قاتىستى ەشقانداي وزگەرىس جاسامايمىز. ونەركاسىپ جانە قۇرىلىس ءمينيسترى قىزمەتىن اتقارىپ جاتىرمىن. بۇل رەتتە، مەنىڭ جۇمىسىم كاسىپورىنداردى دامىتۋ جانە ولاردىڭ قۋاتىن ارتتىرۋعا قاتىستى. قازىر قازاقستاندا 2 اۆتوكولىك زاۋىتىن سالىپ جاتىرمىز، سونداي-اق وسى سالاعا كوپتەگەن جۇمىس ورنى اشىلادى. ياعني وسىنى ەشكىم ەسكەرىپ جاتقان جوق. قازىرگى تەكەتىرەس نەگە بايلانىستى؟ ەكى زاۋىتتى سالىپ جاتىرمىز. KIA كولىگىن شىعاراتىن زاۋىتتىڭ قۇرىلىسى 2025 -جىلدىڭ ورتاسىندا اياقتالادى. الماتى قالاسىنىڭ ماڭىندا قۋاتى 90 مىڭ كولىك وندىرەتىن زاۋىت سالىپ جاتىرمىز. ونداعى جۇمىس ورىندارىن كىم ساقتايدى؟ مەن دەپۋتاتتارعا وسىنداي سۇراق قويدىم جانە تاعى دا قويامىن»، - دەدى قانات شارلاپايەۆ.

بۇل تۇرعىدا ەلىمىزدەگى اۆتوكولىكتىڭ باعاسىن باسقا ەلدەرمەن سالىستىردى.

«تۇركيادا جانە تاعى باسقا ەلدەردە كولىكتىڭ باعاسى بىزدەگى كورسەتكىشتەن ءسال جوعارى نەمەسە تەڭ. سوندىقتان قازاقستانداعى كاسىپورىنداردى جانە جۇمىس ورىندارىن ساقتاۋ ءۇشىن بىزگە پروتەكتسيونيزم جاساۋىمىز كەرەك دەپ ويلايمىن»، - دەدى مينيستر.

وسىعان دەيىن ءماجىلىس دەپۋتاتى نارتاي سارسەنعاليەۆ ۋتيلالىم باعاسىن تومەندەتۋدى ۇسىنعان ەدى.

اۆتور

رۋسلان عابباسوۆ

سوڭعى جاڭالىقتار