ەلىمىزدە تۋۋ كورسەتكىشى جوعارى وڭىرلەر اتالدى
استانا. KAZINFORM – ق ر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتوراعاسى، مادەنيەت جانە اقپارات ءمينيسترى ايدا بالايەۆا ەلىمىزدە تۋۋ كورسەتكىشىنىڭ ارتقانىن ايتتى.
سونىمەن قوسا حالىق سانىنىڭ ارتۋى مەملەكەت الدىنا جاڭا مىندەتتەردى قويىپ وتىر.
«مەملەكەت باسشىسى دەموگرافيالىق وزگەرىستەردى بولجاپ، ولاردىڭ سالدارىمەن كۇرەسۋ ءۇشىن ۋاقتىلى شارالار قابىلداۋ قاجەتتىگىن باسا ايتتى. ەلىمىزدىڭ دەموگرافيالىق دامۋ سالاسىنداعى تەندەنتسيالارعا توقتالساق، 2021-جىلى سوڭعى 34 جىلداعى ەڭ جوعارى تۋۋ كورسەتكىشىنە قول جەتكىزدىك. بۇگىندە الماتى، شىمكەنت، استانا قالاسى جانە تۇركىستان، ماڭعىستاۋ وبلىسىندا حالىق سانىنىڭ ءوسىمى جاقسى دەۋگە بولادى. ال قوستاناي، سولتۇستىك قازاقستان وبلىستارىندا ادام ازايعان. حالىق سانى ورتاشا دەڭگەيدە ءوسۋى قىزىلوردا جانە اتىراۋ وبلىسىنا تيەسىلى»، - دەدى ايدا بالايەۆا سەناتتا وتكەن ۇكىمەت ساعاتىندا.
ونىڭ ايتۋىنشا، كەيىنگى جىلدارى ەلىمىزدە تۋۋ كورسەتكىشى رەكورد ورناتقان.
«حالىق تىعىز ورنالاسقان جانە سانى ارتىپ جاتقان ايماقتار بويىنشا مەملەكەتتىڭ الدىندا كوپتەگەن الەۋمەتتىك جانە ەكونوميكالىق مىندەتتەر تۇر. ەلىمىزدىڭ دەموگرافيالىق دامۋىنا اسەر ەتەتىن انا مەن بالا ءولىمىن ازايتۋ، وتباسىن قولداۋ، اجىراسۋدىڭ الدىن الۋ سەكىلدى ماسەلەلەر ۇلتتىق كوميسسيانىڭ ەرەكشە باقىلاۋىندا»، - دەيدى ول.
بۇعان دەيىن ايدا بالايەۆا قازاقستاندىقتار بالا تاربيەسىندە قانداي قۇندىلىقتارعا ءمان بەرەتىنى تۋرالى ساۋالناما ناتيجەسىمەن بولىسكەن ەدى.
اۆتور
داۋلەت ىزتىلەۋ
