ەلىمىزدە ەسىرتكى قىلمىسىنا قاتىستى جازا وزگەردى

استانا. KAZINFORM - ىشكى ىستەر مينيسترلىگى ەسىرتكىمەن كۇرەس جازاسىنا وزگەرىستەر ەنگىزدى. ول بيىل ناۋرىزدا كۇشىنە ەنەدى.

есірткі
Фото: Қызылорда облысының полиция департаменті

ناشاقورلىقپەن كۇرەستىڭ نەگىزگى جاڭاشىلدىقتارى ۆەدومستۆودا وتكەن باسپا ءسوز ءماسليحاتىندا ايتىلدى.

بىرىنشىدەن، ەسىرتكى بيزنەسىن ۇيىمداستىرۋشىلار مەن ەسىرتكى تاراتۋشىلار، سونىڭ ىشىندە «زاكلادچيكتەر»، ياعني، ەسىرتكى جاسىرۋشىلار ءۇشىن قىلمىستىق جاۋاپكەرشىلىك ايقىندالىپ، اجىراتىلدى.

ەگەر بۇرىن ولارعا قىلمىستىق كودەكستىڭ 297-بابى بويىنشا بىردەي جازا قولدانىلسا، ەندى «زاكلادچيكتەر» وسى باپ بويىنشا جاۋاپقا تارتىلىپ، ولارعا جەڭىلدەتىلگەن جازا قاراستىرىلادى:

- 1-بولىگى بويىنشا جازا 5 جىلدان 8 جىلعا دەيىن باس بوستاندىعىنان ايىرۋدى قۇرايدى. بۇعان دەيىن 5 جىلدان 10 جىلعا دەيىن بولاتىن. اتالمىش جازا از كولەمدەگى ەسىرتكىنى ساتۋ كەزىندە ۇستالعان ادامعا قولدانىلادى (مىسالى، ماريحۋانا - 50 گرامعا دەيىن؛ گاشيش - 5 گرامعا دەيىن، مەفەدرون - 0,02 گرامعا دەيىن، الفا- PVP - 0,01 گرامعا دەيىن)؛

- 2-بولىگى بويىنشا جازا 6 جىلدان 10 جىلعا دەيىن باس بوستاندىعىنان ايىرۋدى قۇرايدى. بۇرىن 6 جىلدان 12 جىلعا دەيىن بولاتىن. بۇل ءىرى كولەمدەگى ەسىرتكىلەردى ساتۋ كەزىندە ۇستالعان ادامعا قولدانىلادى (ماريحۋانا - 1 ك گ- عا دەيىن؛ گاشيش - 200 گرامعا دەيىن؛ مەفەدرون - 0,02 گرامنان 1,5 گرامعا دەيىن؛ الفا- PVP - 0,01 گرامنان 1 گرامعا دەيىن)؛

- 3-بولىگى بويىنشا جازا 7 جىلدان 12 جىلعا دەيىن باس بوستاندىعىنان ايىرۋدى قۇرايدى. بۇرىن جازا 10 جىلدان 15 جىلعا دەيىن بولاتىن. بۇل ەسىرتكىلەردى اسا ءىرى كولەمدە ساتقان جاعدايدا قاراستىرىلادى (ماريحۋانا - 1 كەلىدەن استام؛ گاشيش - 200 گرامنان استام؛ مەفەدرون - 1,5 گرامنان استام؛ الفا- PVP - 1 گرامنان استام).

سونىمەن قاتار، شارتتى تۇردە مەرزىمىنەن بۇرىن بوساتۋ، جازانىڭ وتەلمەگەن بولىگىن جەڭىل جازا تۇرىنە، ياعني ايىپپۇل نەمەسە بوستاندىعىن شەكتەۋگە اۋىستىرۋ مۇمكىندىگى بار.

ءاربىر ۇكىمنىڭ سوتتا جەكە قارالاتىنىن ايتا كەتكەن ءجون.

ەكىنشىدەن، زاڭمەن قىلمىستىق كودەكسكە 297-1 -بابى ەنگىزىلىپ، وندا ەسىرتكى بيزنەسىن ۇيىمداستىرۋشىلار مەن ەسىرتكى وندىرۋشىلەرگە، سونداي-اق لاۋازىمدى تۇلعالارعا جازا كۇشەيتىلەدى.

- 1-بولىگى بويىنشا - 5 جىلدان 10 جىلعا دەيىن؛

- 2-بولىگى بويىنشا - 6 جىلدان 12 جىلعا دەيىن؛

- 3-بولىگى بويىنشا - 10 جىلدان 15 جىلعا دەيىن؛

- 4-بولىگى بويىنشا - 15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ جازاسى.

ۇشىنشىدەن، العاش رەت كۇشتى اسەر ەتەتىن زاتتار مەن ەسىرتكى وندىرىسىندە پايدالانىلاتىن پرەكۋرسورلار بويىنشا زاڭسىز اينالىم ءۇشىن قىلمىستىق جاۋاپكەرشىلىك ەنگىزىلەدى.

بۇعان دەيىن قىلمىستىق جاۋاپكەرشىلىك تەك پرەكۋرسورلاردىڭ كونترابانداسىنا قاتىستى بولعان.

بۇل وزگەرىستەر پرەكۋرسورلار مەن كۇشتى اسەر ەتەتىن زاتتاردىڭ اينالىمىنا باقىلاۋدى كۇشەيتۋگە مۇمكىندىك بەرەدى.

ايتا كەتسەك، تاياۋدا قارجىلىق مونيتورينگ اگەنتتىگى الماتى وبلىسىندا اسا ءىرى مولشەردە ەسىرتكى كونترابانداسى فاكتىسى بويىنشا سوتقا دەيىنگى تەرگەپ- تەكسەرۋدى اياقتادى.

ەسكە سالا كەتەيىك، وتكەن جىلى ەل اۋماعىندا 22 توننا ەسىرتكى تاركىلەندى.

اۆتور

داۋلەت ىزتىلەۋ

سوڭعى جاڭالىقتار